Եվրոպական խորհրդի նախագահ Շառլ Միշելը ապրիլի 6-ին Բրյուսելում համատեղ հանդիպում կանցկացնի Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ։ Այս մասին հայտնում է ԵԽ պաշտոնական կայքը։
«Եվրամիությունն այսօր Բրյուսելում հյուրընկալել է Հայաստանի և Ադրբեջանի բարձրաստիճան պաշտոնյաների հանդիպումը՝ երկու երկրների միջև մի շարք խնդիրների լուծումներ գտնելու համատեղ ջանքերն առաջ տանելու նպատակով: Մասնավորապես, քննարկվել են 2022 թվականի ապրիլի 6-ին Բրյուսելում Եվրոպական խորհրդի նախագահ Շառլ Միշելի, Ադրբեջանի Հանրապետության նախագահ Իլհամ Ալիևի և Հայաստանի Հանրապետության վարչապետ Նիկոլ Փաշինյանի առաջիկա հանդիպման նախապատրաստական աշխատանքները։
Հայաստանի Հանրապետության Անվտանգության խորհրդի քարտուղար Արմեն Գրիգորյանի և Ադրբեջանի Հանրապետության նախագահի օգնական Հիքմեթ Հաջիևի հանդիպումը կազմակերպել է Հարավային Կովկասում ԵՄ հատուկ ներկայացուցիչ Տոյվո Կլաարը։
Առարկայական քննարկումների ընթացքում, որը ներառում էր նաև պարոն Հաջիևի և պարոն Գրիգորյանի առանձին երկկողմ զրույցը, մասնակիցները դիտարկեցին քաղաքական և անվտանգային իրավիճակը և Հայաստանի և Ադրբեջանի միջև հարցերի ողջ շրջանակը՝ որպես Բրյուսելում 2021 թվականի դեկտեմբերի 14-ին երկու երկրների առաջնորդների և նախագահի Միշելի հանդիպման ընթացքում ձեռք բերված փոխըմբռնումների շարունակություն։
Կողմերը պայմանավորվել են կրկին հանդիպել առաջիկա շաբաթների ընթացքում՝ ի թիվս այլոց, քննարկումները շարունակելու համար 2021 թվականի դեկտեմբերի 14-ի ղեկավարների հանդիպման ժամանակ բարձրացված հարցերի շուրջ: Հայաստանն ու Ադրբեջանը կանդրադառնան նաև խաղաղության համաձայնագրի հեռանկարներին:
Եվրամիությունը հավատարիմ է մնում շարունակելու իր ներգրավվածությունը Հարավային Կովկասում տևական խաղաղության և կայունության հասնելու համար»֊, ասվում է ԵՄ հաղորդագրության մեջ։
