2022 թվականի սեպտեմբերին Հայաստանում կայանալու է «STARMUS VI» միջազգային փառատոնը։ Սպասվում է, որ փառատոնին կմասնակցեն 60-ից ավելի գիտնականներ, ինժեներներ, արվեստագետներ աշխարհի տարբեր երկրներից: Մասնակիցների ցանկում լինելու են նոբելյան մրցանակակիրներ, ամերիկահայ տիեզերագնաց-օդաչու, բժշկագիտության դոկտոր, հայազգի առաջին տիեզերագնաց Ջեյմս Բաղյանը, «Նեսթ Լաբս» ընկերության հիմնադիր, iPod ապրանքանիշի ստեղծող, լիբանանյան ծագումով ամերիկացի գյուտարար Թոնի Ֆադելը և այլք:
Դիլիջանում անցկացվող «Մտքերի հայկական երրորդ գագաթնաժողով»-ում լրագրողների հետ զրույցում «STARMUS» փառատոնի հիմնադիր տնօրեն, հայտնի գիտնական Գարիկ Իսրայելյանը նշել է, որ «STARMUS VI» միջազգային փառատոնը, որ նվիրված է լինելու Մարսի վրա առաջին վայրէջքի 50-ամյակին, կկրի «50 տարի Մարսի վրա» խորագիրը։
«Հավատում եմ, որ մոտակա 10-20 տարիներին ամենաշատ խոսվող թեման լինելու է Մարսը: Թեման ամենևին չի ենթադրում, թե փառատոնն ամբողջությամբ նվիրված է լինելու աստղագիտությանը: Այս ուղղությունն ընդհանուր քննարկումների շարքում 20 տոկոս է կազմելու, մնացած հատվածում անդրադարձ է լինելու բիոտեխնոլոգիաներին, ֆիզիկային, բարձր տեխնոլոգիաներին և այլն»,-նշել է Գարիկ Իսրայելյանը:
«STARMUS» փառատոնը սկիզբ է առել Թեներիֆեի աստղաֆիզիկայի համայնքում և 2011 թվականից համախմբում է գիտության ոլորտի միջազգային հեղինակությունների՝ Նոբելյան դափնեկիրների, արվեստի և երաժշտության համաշխարհային հանրահայտ դեմքերի:
