The Jerusalem Post պարբերականն անդրադարձել է թուրքական անօդաչու թռչող սարքերի համար նախատեսված կանադական տեխնոլոգիաների տրամադրման խնդրին
Պարբերականը գրել է, որ Կանադայի կառավարությունը նախորդ տարի ԱԹՍ-ների տեխնոլոգիան վաճառել է Թուրքիային, որոնք Ադրբեջանն օգտագործել է 2020-ին Հայաստանի դեմ սանձազերծած պատերազմի ժամանակ:
The Jerusalem Post-ը գրում է, որ փաստաթղթերի համաձայն՝ Կանադան Թուրքիային է փոխանցել անօդաչու թռչող սարքերի համար նախատեսված Wescam օպտիկան:
2019-ին Կանադան դադարեցրել էր սպառազինության վաճառքը Թուրքիային, սակայն պարբերականը նշում է, որ պահեստամասերի վաճառքը վերականգնվել էր 2020-ին՝ Կանադայի վարչապետի հետ Թուրքիայի նախագահի հանդիպումից հետո:
Baykar-ը՝ Թուրքիայի ռազմարդյունաբերական ընկերությունը, որը կանադական Wescam օպտիկայի հիմքով դրոններ է արտադրում, սերտ կապեր ունի Էրդողանի փեսայի հետ:
The Jerusalem Post-ը նաեւ գրել է, որ Լեռնային Ղարաբաղի պատերազմում իրենց ԱԹՍ-ների տեխնոլոգիաների կիրառման համար քննադատության են ենթարկվել ոչ միայն Կանադան ու Թուրքիան, այլ նաեւ Իսրայելը, որի մահապարտ ԱԹՍ-ները նույնպես օգտագործվել են վերջին պատերազմում: Պարբերականը նշում է, որ Հայաստանի իշխանություններն իրենց խիստ դժգոհությունն են հայտնել հակառակորդին իսրայելական դրոնների վաճառքի համար: