Այսօր Ազգային ժողովի նախագահ Արարատ Միրզոյանն արձանագրություն է ստորագրել Սուրեն Գրիգորյանի՝ պատգամավորի լիազորությունները դադարացնելու մասին:
«Հիմք ընդունելով պատգամավորի հրաժարականի մասին դիմումը և առաջնորդվելով «Ազգային ժողովի կանոնակարգ» սահմանադրական օրենքի 154-րդ հոդվածի 1-ին մասի 6-րդ կետի պահանջով՝ դադարած համարել «Իմ քայլը» կուսակցությունների դաշինքի համապետական ընտրական ցուցակով ընտրված պատգամավոր Սուրեն Գրիգորյանի՝ պատգամավորի լիազորությունները»,- նշված է արձանագրության մեջ:
«Իմ քայլը» խմբակցության նախկին պատգամավոր Սուրեն Գրիգորյանը Ֆեյսբուքի էջում գրել է.
«Երևի ենթադրվում է, որ երկար տեքստ պետք է գրեմ՝ ամփոփելով շուրջ երկու տարվա պատգամավորական գործունեությունս, փոխարենը ուղղակի կարճ ասեմ, թե ինչ եզրահանգման եկա այս երկու տարում։ Խորապես համոզված եմ, որ մեր պետության հաջողության գրավականն է միմյանց նկատմամբ սեր տածող, ներողամիտ, ուրիշի սխալը սեփական ջանքով ուղղելուն ունակ և աշխատանքի մշակույթ ունեցող հանրություն ունենալը։ Մնացածը, որքան էլ ավելի կարևոր թվա, երկրորդական է»։
Հիշեցնենք, որ մարտի 29-ին ԱԺ պատգամավոր Սուրեն Գրիգորյանը մանդատից հրաժարվելու դիմում էր ներկայացրել:
