Մոսկվան պատրաստ է պայմաններ ստեղծել ՅՈՒՆԵՍԿՕ-ի համար՝ Լեռնային Ղարաբաղի մշակութային ժառանգության պահպանման աշխատանքների շրջանակում: Այդ մասին երկուշաբթի հայտարարել է Ռուսաստանի ԱԳ նախարար Սերգեյ Լավրովն Ադրբեջանի նախագահ Իլհամ Ալիևի հետ հանդիպման ժամանակ:
«ՅՈՒՆԵՍԿՕ-ն որպես միջազգային մշակութային ժառանգության պահպանման համար պատասխանատու կազմակերպություն, նույնպես շահագրգռված է մասնակցելու այդ ջանքերին: Մենք պատրաստ ենք օգնելու ստեղծել պայմաններ, որոնք դա հնարավոր կդարձնեն: Բնականաբար, մենք պետք է հաշվի առնենք այս հարցում դրա վերաբերյալ պայմանավորվածությունները, շահագրգիռ կողմերի դիրքորոշումը», – ասել է Լավրովը:
«Պատերազմի հումանիտար հետևանքների լուծման հետ կապված հարցեր. դուք հիշատակել եք ռազմագերիներին, պատմական ժառանգության հետ կապված որևէ չարաշահում թույլ չտալու մասին. մենք ցանկանում ենք օգնել այս ամենը հնարավորինս կառուցողական լուծելու հարցում»,- ընդգծել է նա:
Ինչպես նշել է նախարարը, Ռուսաստանը կշարունակի իր ներդրումն ունենալ, որպեսզի Ռուսաստանի Դաշնության, Ադրբեջանի և Հայաստանի ղեկավարների համաձայնագրերը Ղարաբաղի վերաբերյալ իրականացվեն «կառուցողական արդյունքին նպաստող» պայմաններում:
Լավրովը նաև ուշադրություն է հրավիրել այն փաստի վրա, որ Ռուսաստանի Դաշնությունն աջակցում է այն ձեռնարկություններին, որոնք պատրաստ են աշխատել Լեռնային Ղարաբաղում.
«Մենք խրախուսում ենք մեր ընկերություններին մասնակցել վերականգնման աշխատանքներին, ձեր կողմից նախանշված ծրագրերին», ասել է Լավրովը։