70-ից ավելի երկիր հայտ են ներկայացրել՝ Երևանում կայանալիք սամբոյի աշխարհի առաջնությանը մասնակցելու համար

Երևանում կայանալիք սամբոյի աշխարհի առաջնությանն ընդառաջ՝ Հայաստանի հավաքականները բաց մարզում են անցկացրել, որից հետո գլխավոր մարզիչ Վովիկ Խոջայանը ներկայացրել է ԱԱ-ին մասնակցող թիմի կազմը։

Հայաստանի պատվիրակությունն ԱԱ-ին ներկայացված կլինի 21 մարզիկով՝ մարզական սամբոյի, մարտական սամբոյի և կանանց սամբոյի մրցումներում։

Մարզական սամբո․ Տիգրան Կիրակոսյան (58 կգ), Նարեկ Դալլաքյան (64 կգ), Արամ Աղաջանյան (71 կգ), Բորիս Շատվերյան (79 կգ), Վահագն Չալյան (88 կգ), Արսեն Խանջյան (98 կգ), գերծանր քաշային՝ Հակոբ Առաքելյան:

Մարտական սամբո․ Մխիթար Մխիթարյան (58 կգ), Վահրամ Գրիգորյան (64կգ), Վաչիկ Վարդանյան (71կգ), Սարգիս Վարդանյան (79 կգ), Ավետիք Պողոսյան (88 կգ), Արման Ավանեսյան (98 կգ)։

Աղջիկներ․ Արփինե Մնացականյան (50 կգ), Վարսիկ Գրիգորյան (54 կգ), Մելինե Մամիկոնյան (59 կգ), Մարինե Մարտիրոսյան (72 կգ), Նելլի Ավետիսյան (80 կգ), գերծանր քաշային՝ Աննա Մկրտչյան:

Հավաքականի մարզչական շտաբում կլինեն նաև Հայկ Ավետիսյանը և Էռնեստ Միրզոյանը։ ԱԱ-ում կաշխատի նաև միջազգային կարգի մրցավար Ազատ Անդրյանը։

Երևանում կայանալիք սամբոյի աշխարհի առաջնությանը մասնակցելու համար 70-ից ավելի երկրներ են հայտ ներկայացրել։ Հայաստանի սամբոյի ֆեդերացիայի նախագահ Միքայել Հայրապետյանի խոսքով՝ սամբոյի միջազգային ֆեդերացիայի օրացույցում մեծահասակների աշխարհի առաջնությունը տարվա խոշորագույն միջոցառումն է, իսկ նախապատրաստական աշխատանքներն ընթանում են՝ ըստ նախատեսածի։

«Շատ երկար ենք պատրաստվել այս մրցումներին․ անկասկած՝ արդյունքներ ունենալու ենք։ Մեր կազմում աշխարհի ու Եվրոպայի մրցանակակիրներ են ընդգրկված, ունենք լավ մարզիկներ, որոնք լավ են պատրաստվել աշխարհի առաջնությանն ու, վստահ եմ, բարձր կպահեն մեր երկրի պատիվը։ Կազմակերպչական առումով ևս ամեն ինչ հարթ է ընթանում։ Նախորդ տարի դեռահասների, պատանիների և երիտասարդների աշխարհի առաջնությունը, մեր միջազգային գործընկերների գնահատմամբ, փայլուն ենք անցկացրել։ Վստահ եմ՝ այս տարի ևս պատվով կկատարենք մեր առջև դրված խնդիրը․ այս առումով ՀՀ կառավարության ու ԿԳՄՍ նախարարության աջակցությունն անգնահատելի է։ Ամեն ինչ արվում է, որպեսզի առաջնությունն անցկացվի ամենաբարձր մակարդակով»,- ասում է Միքայել Հայրապետյանը և նշում՝ ԱԱ-ին կմասնակցեն 500-ից ավելի մարզիկներ, հյուրերի ընդհանուր թիվը շուրջ 2500 կլինի։

Ֆեդերացիայի նախագահը լիահույս է՝ Կարեն Դեմիրճյանի անվան մարզահամերգային համալիրի տրիբունաները լեփ-լեցուն կլինեն, ու հայ երկրպագուները մեր մարզիկներին կմղեն հաղթանակների։

«Երկրպագուները մեր ուժն են։ Բոլորս միասին պետք է թիկունք լինենք մեր մարզիկներին, աջակցենք նրանց Մարզահամերգային համալիրում, որպեսզի կարողանանք բարձր հաջողություններ արձանագրել։ Աշխարհի առաջնությունում յուրաքանչյուր գոտեմարտ եզրափակչի պես է լինելու։ Պետք է հոգեբանորեն շատ պինդ լինենք, չտրվենք սադրանքներին ու էմոցիաներին։ Պատրաստ ենք ցանկացած մարտահրավերի։ Ճիշտ ու հավաքված աշխատանքի դեպքում, վստահ եմ, փայլուն արդյունքներ կունենանք»,- եզրափակում է Միքայել Հայրապետյանը։

Հայաստանի սամբոյի հավաքականները ԱԱ-ին նախապատրաստվելու նպատակով հոկտեմբերի 25-ից ուսումնամարզական հավաք են անցկացնում Օլիմպավանում։ Այն կավարտվի նոյեմբերի 5-ին։ Առաջին գոտեմարտերը նախատեսված են նոյեմբերի 10-ին։

Հավաքականի գլխավոր մարզիչ Վովիկ Խոջայանի խոսքով՝ Երևանում կայանալիք ԱԱ-ին պատասխանատվությունը շատ մեծ է. «Տղաներին ասել եմ, որ Հայաստանում տարած յուրաքանչյուր հաղթանակ մեզ համար պատիվ է լինելու։ Պարզապես պետք է անենք առավելագույնը։ Միայն ուրախ կլինենք, եթե մեր մարզիկները շատ մեդալներ նվաճեն, բայց ամեն ինչ գորգը ցույց կտա։ Ով պատրաստ լինի, նա էլ կհաղթի։ Լավ պատրաստություն ենք անցել, մեծ աշխատանք ենք տարել, որպեսզի լավ արդյունքներ գրանցենք»։

Մարզչի խոսքով՝ երկրպագուների աջակցությունը մեծ դերակատարություն կունենա թիմին հաղթանակների մղելու առումով։

Սամբոյի աշխարհի առաջնությունը կանցկացվի նոյեմբերի 10-12-ը Կ․ Դեմիրճյանի անվան մարզահամերգային համալիրում։

Total
0
Shares
Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով

Նախորդը

Երկու եղբայրներն ու քույրը հարվածել են պարեկներին. առաջադրվել է մեղադրանք

Հաջորդը

Համակերպվել էիք, որ «պիպետկով կաթացնեն» այնքան զենք, ինչքան պետք է. Միրզոյանը՝ ընդդիմադիր պատգամավորին

Առնչվող նյութեր
Դիտել

Կալաշնիկով, կարաբին, ինքնաշեն հրացան ու զինամթերք. ապօրինի զենք-զինամթերքի կամավոր հանձնում ոստիկանության բաժիններում

Ոստիկանության տարածքային ստորաբաժանումների ծառայողները շարունակում են բնակչության հետ ակտիվ բացատրական աշխատանքը՝ ապօրինի պահվող զենք-զինամթերքը կամավոր հանձնելու ուղղությամբ։ Այս…
Դիտել

Հայաստանի համար կարևոր կլինի, եթե ԵՄ դիտորդական առաքելության կենտրոնակայանը լինի Ջերմուկում. Հակոբ Բադալյան

Հայաստանի համար կարեւոր կլինի հասնել նրան, որ էդ դիտորդական առաքելության կենտրոնակայանը լինի Ջերմուկում։ Այս մասին նշված է քաղաքական…
Դիտել

Մխիթարյանը ՉԼ շաբաթվա լավագույն ֆուտբոլիստի և լավագույն գոլի հեղինակի հավակնորդ է

Հայաստանի ազգային հավաքականի նախկին ավագ Հենրիխ Մխիթարյանը հավակնում է դառնալ Չեմպիոնների լիգայի շաբաթվա լավագույն ֆուտբոլիստ և լավագույն գոլի…

Հետևեք մեզ Instagram-ում

Հավանեք մեր Facebook էջը

Բաժանորդագրվեք մեր Youtube ալիքին

Total
0
Share