ՊԵԿ նախագահ Ռուստամ Բադասյանն անդրադարձել է եկեղեցուն հարկելու հնարավորությանը։ Նրա խոսքով՝ ՊԵԿ-ում այս կապակցությամբ որևէ նախագիծ չեն նախապատրաստում։ Հարցին՝ հիմա եկեղեցին ինչ մասով է հարկվում, նա նշել է. «Ենթադրում եմ, որ որոշ աշխատակիցներ ունեն, որ զբաղվում են տնտեսական ապահովմամբ, նրանց աշխատավարձ, դրանից՝ եկամտահարկ։ Հարկային օրենսգրքով սահմանված են որոշակի արտոնություններ ծիսական պարագաների օտարման մասով, անշարժ գույքի հարկի արտոնություն կա»։
Բադասյանն ասել է, որ եկեղեցու ներկայացուցիչների հետ քննարկումներ է ունեցել՝ բարեգործության մասին օրենքի կարգավորումների հետ կապված. «Առաջարկել էինք ներմուծման դեպքում վճարումներ կատարել։ Ես ՊԵԿ նախագահ եղել եմ, այդ քննարկումները եղել են, ինձ փոխանցվել է։ Կապված պարաֆինի, թերեզինի հետ՝ առաջարկել ենք պետբյուջեից ֆինանսավորել մաքսատուրքերը, որ պետք է վճարվեն, բայց անհասկանալի պատճառներով չի ընդունվել այդ առաջարկը»։
