ԱԺ-ում 2024թ. պետբյուջեի նախագծի քննարկման ժամանակ բանավեճ եղավ ԱԳ նախարար Արարատ Միրզոյանի ու «Հայաստան» խմբակցության պատգամավոր Քրիստինե Վարդանյանի միջև․
«Հայաստանը կարողանում է անհամեմատ շատ զենք ձեռք բերել ու անհամեմատ շատ երկրներից, քան ձեր կուսակցությունը կհանդգներ կամ կերազեր ամենապայծառ երազում»,- հայտարարեց Միրզոյանը՝ հավելելով․ «Սովոր էիք, համակերպվել էիք, որ «պիպետկով կաթացնեն» այնքան զենք, ինչքան պետք է, ու «չկաթացնեն» այնքան զենք, երբ դրա կարիքը լինի, որպեսզի այդտեղ էլ Հայաստանը հաշվարկված կերպով ծնկի բերվի, ու գործի դրվեն այլ սցենարներ»։
Նա վստահեցրեց, որ իրենց իշխանությունը շատ ավելին կարող է անել ու շատ ավելին բերել: Ըստ նրա՝ բերվելու են պաշտպանական զենքեր. «Մենք որևէ հարձակողական նպատակ չունենք, մեր երկրի ինքնիշխան իրավունքն է՝ ձեռք բերել պաշտպանական զինատեսակներ, ու մենք շատ ավելին կբերեինք, եթե չլինեին լոգիստիկ խնդիրներ», – ասել է նա։
