Փարիզում երեկ տեղի է ունեցել France Football-ի մրցանակաբաշխությունը։ Արգենտինայի հավաքականի և ՄԼՍ ներկայացնող «Ինտեր Մայամի» ակումբի 36-ամյա ավագը 2022/23 մրցաշրջանի արդյունքներով ստացել է ֆուտբոլի ամենահեղինակավոր անհատական մրցանակը:
Նախորդ մրցաշրջանում Մեսսին, խաղալով ՊՍԺ-ում, դարձավ Ֆրանսիայի չեմպիոն և նվաճեց երկրի Սուպերգավաթը:
Արգենտինայի հավաքականի կազմում Լիոնել Մեսսին հաղթել է ԱԱ-2022-ում: Նա հեղինակել է 7 գոլ, դարձել մրցաշարի երկրորդ ռմբարկուն և ճանաչվել Քաթարում կայացած աշխարհի առաջնության լավագույն ֆուտբոլիստ:
Սա Մեսսիի 8-րդ ռեկորդային «Ոսկե գնդակն» է։ Ֆուտբոլային հանճարը մրցանակին արժանացել է նաև 2009, 2010, 2011, 2012, 2015, 2019, 2021, 2022/23թթ.։ Կրիշտիանու Ռոնալդուն մրցանակին արժանացել է 5 անգամ։
Ներկայացնում ենք մնացած մրցանակների դափնեկիրներին։
Էմիլիանո Մարտինեսը France Football-ի կողմից արժանացել է Լև Յաշինի անվան մրցանակը:
«Աստոն Վիլլայի» դարպասապահն ԱԱ-2022-ում հաղթել է Արգենտինայի ընտրանու հետ և եղել եզրափակիչ խաղի գլխավոր հերոսներից մեկը՝ վերջին վայրկյաններին «սեյվ» կատարելով։
Յաշինի գավաթը հանձնվում է աշխարհի լավագույն դարպասապահին: Նախորդ տարի մրցանակը ստացել էր Տիբո Կուրտուան։
Էրլինգ Հոլանդը ստացել է Գերդ Մյուլլերի անվան մրցանակը։
France Football-ը «Գերդ Մյուլլերի գավաթը» հանձնում է մրցաշրջանի լավագույն ռմբարկուին:
20022/23 մրցաշրջանում Հոլանդը «Մանչեսթեր Սիթիի» հետ կատարել է թրեբլ և 53 խաղում դարձել է 52 գոլի հեղինակ:
Ջուդ Բելինգհեմը France Football-ի կողմից ստացել է աշխարհի լավագույն երիտասարդ ֆուտբոլիստի մրցանակը:
Անգլիայի հավաքականի և «Ռեալի» 20-ամյա կիսապաշտպանը ստացել է «Կոպա տրոֆին»։
