Դեռես ձևավորման օրվանից էր ակնհայտ, որ ՀՀ ԱԺ «Հայաստան» խմբակցությունը Ռոբերտ Քոչարյանի անձնական օգտագործման հերթական օբյեկտն է դառնալու և ծառայելու է ոչ թե ընտրողների ու երկրի, այլ բացառապես իր անձնական շահերին։ Ինչպես ժամանակին երկիրն էր ծառայեցնում իր ու իր ընտանիքի անձնական շահերին։
Հայաստանի երկրորդ նախագահ Ռոբերտ Քոչարյանի որդին, Լևոն Քոչարյանը, որն այժմ կալանքի տակ է, այսօր պատգամավորական մանդատ ստացավ։ Որպեսզի «ոսկե տղան» պատգամավորական մանդատ ստանար՝ ավելի վաղ «Հայաստան» դաշինիքի համամասնական ցուցակի երեք թեկնածու հրաժարվել էր պատգամավորական մանդատից։
Հայերին բնորոշ հայտնի խոսք կա՝ «Ինչ անում ենք՝ երեխաների համար ենք անում»։ Քոչարյանն էլ՝ ինչ անում է երեխայի համար է անում, ուղղակի նա իր երեխայի համար արածը փաթեթավորում է ռազմահայրենասիրական պաթոսով։ Ուրիշների երեխաները զրահաբաճկոնով ու սաղավարտով են պաշտպանվում, իսկ իր երեխան՝ պատգամավորական մանդատով։
Կառավարման տարիներին զենքը, սաղավարտն ու զրահաբաճկոնը տալիս էր ուրիշների երեխաներին, իսկ սեփական երեխային տալիս էր երկրի հարստությունը, բիզնեսները, մենաշնորհները։ Քոչարյանը նույն տրամաբանութամբ էլ այսօր է առաջ շարժվում։ Հանուն իր անձնական ամբիցիաների՝ փողոց է հանում մարդկանց, սակայն պատգամավորական մանդատով պաշտպանում է որդուն։ Ռոբերտ Քոչարյանը հերթական անգամ ցույց է տալիս, որ չի հարգում ոչ միայն իր համակիրներին, որոնց արդեն 3-4 տարի փողոցներով զբոսանքի հանում, այլ նույնիսկ քաղաքական թիմի անդամներին, որոնց մատի մեկ շարժումով դուրս է շպրտում պատգամավորական թեկնածուների ցուցակից։
Հեղինակ՝ Լևոն Սեդրակյան