«Ինտերը» գեղեցիկ հաղթանակ տարավ միլանյան դերբիում և առաջնության ավարտից 5 տուր առաջ հռչակվեց Իտալիայի չեմպիոն:
Սիմոնե Ինձագիի գլխավորած թիմը 33-րդ տուրի կենտրոնական խաղում 2-1 հաշվով առավելության հասավ «Միլանի» նկատմամբ:
«Ինտերը» 20-րդ անգամ նվաճեց «Սկուդետոն», նախորդ անգամ Ա սերիայի չեմպիոնական տիտղոսին տիրացել էր 2020/2021 մրցաշրջանում:
Մխիթարյանի համար սա առաջին չեմպիոնական տիտղոսն է Եվրոպայի թոփ-5 առաջնություններում: Նա 21-րդ դարում առաջին հայ ֆուտբոլիստն է, որը հաղթեց Եվրոպայի թոփ-5 առաջնություններից որևէ մեկում:
20-րդ դարում նման հաջողության էր հասել Հայաստանի ազգային հավաքականի նախկին ֆուտբոլիստ Միշել Տեր-Զաքարյանը, որը 1982/1983 մրցաշրջանում «Նանտի» հետ նվաճել էր Ֆրանսիայի Լիգա 1-ի տիտղոսը:
Մխիթարյանը նախկինում հաղթել էր միայն Հայաստանի և Ուկրաինայի առաջնություններում: Երևանի «Փյունիկի» կազմում 5 անգամ դարձել էր Հայաստանի չեմպիոն, Դոնեցկի «Շախտյորի» կազմում էլ երեք անգամ տիրացել էր Ուկրաինայի Պրեմիեր լիգայի չեմպիոնական տիտղոսին:
Մխիթարյանն «Ինտերի» հետ չորրորդ տիտղոսը նվաճեց, 2022/2023 մրցաշրջանում դարձել էր Իտալիայի գավաթակիր և սուպերգավաթակիր, իսկ այս մրցաշրջանում երկրորդ անգամ էր տիրացել Սուպերգավաթին:
Ընդհանուր առմամբ՝ հայ ֆուտբոլիստը 26-րդ տիտղոսը նվաճեց կարիերայում
