Գեղանկարիչ Վահե Բաղումյանը օրերս ներկայացավ իր անհատական ցուցահանդես-վաճառքով ` «Աշնան խոհեր» խորագրով։ Բնության պատկերները վառ ու տաք գույները ներկայացնելով կտավների վրա, ցույց տվեց վրձնահարվածով ընդգծած ոճը, առանձնահատուկ մոտեցումը հայկական բնապատկերներին։
Ցուցահանդեսին ներկայացված են ոչ միայն աշնան, այլև տարբեր եղանակների բնապատկերներ.
«Չնայած նկարներից մի քանիսում ձմեռ է, սակայն բոլոր կտավներում փորձել եմ աշնանային արևի ջերմությունը ներառել»,- նշում է Վահեն։ Նրա ցուցահանդեսների թեմատիկան այսքանով չի սահմանափակվել։ Երբ մասնակցել է քառօրյա և քառասունչորսօրյա պատերազմներին, դրանցից հետո հանդես է եկել զարթոնքի ու նոր կյանքի գաղափարակիր ցուցահանդեսներով, որոնք նվիրված են եղել հայ զինվորներին։
«Անգամ պատերազմը չի խանգարել նրա ստեղծագործ մտքին արարելու նոր կտավներ, և այդքանից հետո չի կորցրել գեղեցիկը տեսնելու և պատկերելու շնորհը»- նշում է Վահեի ուսուցիչ՝ Հրանտ Թադևոսյանը։
Կտավներում արտացոլված է նկարչի ու բնության անկեղծ զրույցը, աշնանային հարուստ ներկապնակը։ 48 աշխատանքներից յուրաքանչյուրում մարդիկ կգտնեն իրենց նախընտրելի եղանակը, գույնը և տրամադրությունը՝ այցելելով «Փյունիկ» Զարգացման կենտրոնի ցուցասրահ։ Այն բաց է ամեն օր մինչև նոյեմբերի 25-ը` ժամը 20:30։
Հեղինե Մխիթարյան, ՀՊՄՀ Լրագրության բաժին
