Միջազգային իրավական հարցերով ՀՀ ներկայացուցիչ Եղիշե Կիրակոսյանն անդրադարձել է Ադրբեջանի դեմ ՄԱԿ Արդարադատության միջազգային դատարանի որոշմանը։
Կիրակոսյանի խոսքով, այդ որոշումն ունի պարտադիր բնույթ. «Դա նշանակում է, որ պետությունն անմիջապես պետք է քայլեր ձեռնարկի որոշման հրապարակման պահից: Ժամկետ նշված չէ, բայց դա նշանակում է, որ անմիջապես գործում է»,- ընդգծել է նա:
Կիրակոսյանը դրական է համարել փաստը, որ Հաագայի դատարանի որոշումից հետո շատ երկրների ԱԳՆ-ներ, ՄԱԿ-ի գլխավոր քարտուղարը հայտարարություններ արեցին՝ հղում անելով դատարանի որոշման վրա։
Նրա խոսքով. «Կարծում եմ՝ դրանք կարևոր գործընթացներ են, որոնք պետք է ավելի շատանան, մաքսիմալ պետք է ուժեղացնել ճնշումն այս ուղղությամբ, միակ ճանապարհը սա է, ուրիշ ճանապարհ, ցավոք սրտի, չունենք»։
Ըստ Կիրակոսյանի՝ Հայաստանը թե՛ դիվանագիտական միջոցներով, թե՛ քաղաքական հնարավոր լծակներով պետք է հետևողական լինի, որ կատարվի Հաագայի դատարանի որոշումը։
