Հանդիպումը կառուցողական էր, եռակողմ հանդիպումից հետո լրագրողների հետ զրույցում հայտարարել է Ադրբեջանի նախագահ Իլհամ Ալիևը։
«Խաղաղության պայմանագիրը պետք է հիմնվի միջազգային նորմերի և սկզբունքների վրա, իսկ Ղարաբաղի վերաբերյալ որևէ դրույթն այդտեղ անընդունելի է»,- հայտարարել է Ալիև։ ։
Նա նշել է, որ երեք օր առաջ ստացել են Հայաստանի պատասխանն իրենց առաջարկներին. «Հայաստանի դիրքորոշման մեջ, առաջին հայացքից, առաջընթաց կա, բայց սա բավարար չենք համարում»։
Ալիևը նաև տեղեկացրել է, որ առաջարկել են Հայաստանին հայ-ադրբեջանական սահմանին հսկիչ անցակետ տեղադրել։
«Եթե խոսում ենք դելիմիտացիայի մասին, իսկ հսկիչ անցակետերը պիտի տեղադրվեն «Զանգեզուրի» միջանցքի երկու կողմերում, ապա նաև Լաչինի ու Հայաստանի միջև»,- նշել է Ալիևը։
Հշեցնենք, որ այսօր Մյունխենի անվտանգության համաժողովի շրջանակում տեղի է ունեցել ՀՀ վարչապետ Նիկոլ Փաշինյանի, ԱՄՆ պետքարտուղար Էնթոնի Բլինքենի և Ադրբեջանի նախագահ Իլհամ Ալիևի եռակողմ հանդիպումը:
Հանդիպմանն անդրադարձ է կատարվել Հայաստանի և Ադրբեջանի միջև խաղաղության պայմանագրի նախագծի շուրջ աշխատանքների ընթացքին, ինչպես նաև տարածաշրջանային տրանսպորտային ենթակառուցվածքների ապաշրջափակմանն ու երկու երկրների միջև դելիմիտացիայի իրականացմանը` համաձայն Պրահայում ձեռք բերված պայմանավորվածության։
