Կառավարությունն այսօրվա նիստում հավանություն է տվել հարկային օրենսգրքում փոփոխությունների նախագծին, որով առաջարկվում է էլեկտրականությամբ աշխատող մեծ, միջին և փոքր շարժիչով ավտոբուսների, մարդատար ավտոմեքենաների, մոտոցիկլետների և մոպեդների ներմուծումը և օտարումը ավելացված արժեքի հարկից ազատելու մասով գործող կարգավորումը ևս մեկ տարով երկարաձգել:
Այժմ այդ մեքենաներն ԱԱՀ վճարումից ազատված են մինչև 2024-ի հունվարի 1-ը, որն առաջարկվում է երկարաձգել մինչև 2025–ի հունվարի 1-ը:
Էկոնոմիկայի փոխնախարար Արման Խոջոյանը նշեց, որ 2022թ. մարտին ԵԱՏՄ որոշմամբ Հայաստանին է տրամադրվել սակագնային արտոնություն՝ առանց մաքսատուրքի վճարման էլեկտրական մեքենաների ներմուծելու համար, համապատասխանաբար, 2022թ․՝ 7 հազար հատ, 2023թ․՝ 8 հազար հատ:
«Էլեկտրական շարժիչով աշխատող տրանսպորտային միջոցների ձեռքբերումն ու շահագործման խթանումը համահունչ է կանաչ տնտեսության նպատակների հետ։ Նկատվում է քաղաքներում ածխաթթու գազի արտանետումների զգալի կրճատում և քաղաքային աղտոտվածության մակարդակի նվազում»,-ասաց փոխնախարարը։