Արդարադատության նախարար Գրիգոր Մինասյանը տեղեկացրել է, որ կառավարական թաղամաս կկառուցվի։
Ըստ նրա՝ կառավարական հաստատությունների տեղափոխումը կբեռնաթափի Երևանի կենտրոնը, իսկ շենքերը կօգտագործվեն բիզնես–նպատակով․
«Կար գաղափար, որ արդարադատության ոլորտի հիմնարկությունների շենք–շինությունները տեղակայվեն մեկ վայրում։ Այնուհետ, իմ կարծիքով, շատ ավելի ճիշտ որոշում է կայացվել, և այդ պրոցեսը ղեկավարում է փոխվարչապետ Տիգրան Խաչատրյանը՝ նախագիծը վերածել ավելի մեծ նախագծի՝ կառավարական թաղամասի։ Ոչ թե միայն նախարարությունն ու դատախազությունը, այլև բոլոր պետական գերատեսչությունները կենտրոնից դուրս հանվեն, տեղափոխվեն քաղաքի մերձակայք, որը որևէ մարզի տարածքում կլինի։ Համ կենտրոնը կբեռնաթափվի, համ հսկա շինությունները, որ պետական չինովնիկներն են զբաղեցնում, կտրվի բիզնեսին՝ վարձատրության, վաճառքի և այլն, և շահույթ կգեներացվի: Կա դրա միջազգային փորձը»,- ասել է նա։
Ըստ Մինասյանի՝ այս տարի կառավարական թաղամասի մոդելը պատրաստ կլինի։