Չեմ կարծում՝ սա այն գործն է, որ գլխավոր դատախազը այնքան անլրջանա ու իր հեղինակության հետ խաղա, որ մտնի ԱԺ և միջնորդի, որ Լևոն Քոչարյանին ազատությունից զրկեն։ Այս մասին այսօր լրագորղների հետ զրույցում ասաց «Հայաստան» խմբակցության պատգամավոր Գեղամ Նազարյանը։
«Կարծում եմ՝ հնարավոր տարբերակ է, որ մտնեն ԱԺ և թույլտվություն խնդրեն, որ գործը շարունակվի։ Այսինքն, դրա համար ևս ԱԺ-ի համաձայնությունն է պետք։ Չեմ բացառում, որ կարող են նման քայլ անել, բայց ես էլի խորհուրդ չեմ տա. մեր երկիրը առանց այն էլ «սարքովի» գործերով թուլանում է»,- հայտարարել է Գեղամ Նազարյանը։
Ըստ Նազարյանի՝ երեկվա տեղի ունեցածը կալանքից ազատման միջոց կամ փորձ չի եղել․
«Համամիտ չեմ, թե Լևոն Քոչարյանի նման մարդը միայն ազատության մեջ հայտնվելու համար կարող է վերցնել մանդատը։ Հիմա կհարցնեք. բա ինչու՞ երեք հոգի հրաժարվեցին մանդատից։ Այո, հրաժարվեցին՝ ի աջակցություն ապօրինաբար կալանքի տակ գտնվող իրենց ընկերոջ»,- նշել է պատգամավորը։