Հայաստանի կառավարիչը խոստովանեց, որ ինքը ԼՂ-ն զոհաբերել է գիտակցաբար. այսօր լրագրողների հետ ճեպազրույցում ասաց Հայաստանի երրորդ նախագահ Սերժ Սարգսյանն՝ անդրադառնալով Նիկոլ Փաշինյանի վերջին հարցազրույցում հնչեցրած մտքերին։
«Երբ նա խոսում է ինչ-որ մահակների մասին, այսինքն, իր համար ԼՂ հարցը մահա՞կ էր Հայաստանի գլխին։ Ուղղակի ես չհասկացա՝ ո՞ր մահակների մասին էր խոսում, կամ ովքե՞ր էին այդ մահակները պարզել Հայաստանի գլխին՝ համանախագահնե՞րը, ովքեր 5 անգամ գրավոր հայտարարություն են տարածել ԼՂ վերջնական կարգավիճակի մասին, որ այն պետք է որոշվի ազատ կամարտահայտությամբ։ Ո՞ւմ մասին էր ասում, որ մահակ են պարզել Հայաստանի գլխին։ Միգուցե այն երկրի, որը մեզ միլիարդներով անվճար և զեղչված գներով սպառազինություն է մատակարարել և ինչն ամբողջությամբ ինքը հանձնել է Ադրբեջանին։ Բայց, գոնե, հասկացանք բոլորս իր խոստովանությունը, և ինքը շատ ճիշտ էր ասում՝ գիտակցաբար է զոհել Ղարաբաղը»,- ասաց Սարգսյանը։