ՀԱՊԿ գլխավոր քարտուղար Իմանգալի Տասմագամբետովը հայտարարել է, թե Հայաստանը ՀԱՊԿ-ի գործընկերներին խնդրել է օրակարգից հանել երկրին օգնության մասին փաստաթուղթը։
Նոյեմբերի 23-ին նախատեսված է ՀԱՊԿ հավաքական անվտանգության խորհրդի նստաշրջանի անցկացումը: ՀԱՊԿ գլխավոր քարտուղարը Բելառուսի նախագահ Ալեքսանդր Լուկաշենկոյի հետ հանդիպմանն ասել է. «Երկրորդ հարցը հավաքական անվտանգության խորհրդի հանձնարարականն է՝ լրամշակել Հայաստանին օգնության վերաբերյալ որոշումը։ Չնայած բոլոր դաշնակիցները սատարել են այդ որոշմանը, սակայն հայկական կողմը որևէ հետաքրքրություն չի հայտնել այդ փաստաթղթի նկատմամբ․ ավելին, մեր աշխատանքի ավարտական մասում նրանք խնդրել են այն ընդհանրապես հանել օրակարգից»,- ասել է նա։
