Բելառուսի նախագահ Ալեքսանդր Լուկաշենկոյի ինքնաթիռը վայրէջք է կատարել Ֆիզուլիի օդանավակայանում։ Այս մասին հաղորդում է «Ազատություն» ռադիոկայանը, հղում անելով Minval.az-ին։
«Пул Первого»-ը տելեգրամյան ալիքն իր հերթին լուսանկարներ է հրապարակել՝ նշելով, որ Լուկաշենկոյին են ներկայացրել Ֆուզուլիի և Զանգիլանի նոր օդանավակայանների մակետները։
Այցից այլ մանրամասներ դեռ չեն հաղորդվում։ Լուկաշենկոյին ուղեկցում է Ադրբեջանի նախագահ Իլհամ Ալիևը։
«Ազատությունը» հաղորդում է նաև, որ երեկ Լուկաշենկոն Բաքու կատարած այցի ընթացքում հայտարարել է, որ «Բելառուսը պատրաստ է օգնել Ադրբեջանին նախկին գրավյալ տարածքների վերակառուցման հարցում»։
«Եկել է ամենածանր պահը, երբ պետք է վերականգնել այդ տարածքները, վերադարձնել բնակիչներին։ Հաղթանակը արդեն տարել եք, պահել եք այն, այժմ եկել է վերածննդի պահը», – հայտարարել է Լուկաշենկոն։
Այդ շրջաններում հսկայածավալ աշխատանքի հեռանկարներ կան՝ իր հերթին նշել էր Ադրբեջանի նախագահ Իլհամ Ալիևը՝ շեշտելով, որ «հրավիրել է բելառուսական ընկերություններին ակտիվորեն մասնակցել Ղարաբաղի և Արևելյան Զանգեզուրի գոտիների վերականգնմանը»։