Այսօր տեղեկություն տարածվեց, որ ՀՀ վարչապետ Նիկոլ Փաշինյանի որդուն՝ Աշոտ Փաշինյանին, իր տան մերձակայքից փորձել են առևանգել: Նախնական տեղեկություններով՝ առևանգման մասնակիցները «Որդիների կանչ» ՀԿ անդամներն են, ովքեր ստիպել են Աշոտ Փաշինյանին նստել իրենց մեքենան, սակայն, մի պահ կանգ առած մեքենայից Աշոտ Փաշինյանին հաջողվել է դուրս թռչել, որի հետևանքով նրան վրաերթի է ենթարկել նույն կազմակերպության անդամների հետևից ընթացող մեքենան: Արդյունքում վնասվել է Աշոտ Փաշինյանի ոտքը, իսկ դեպքի վայրից «Որդիների կանչ» հասարակական կազմակերպության անդամները դիմել են փախուստի:
Ի դեպ, «Որդիների կանչ» հասարակական կազմակերպության ներկայացուցիչներից է Գարիկ Գալեյանը։ Նա այն հայտնի անձնավորությունն է, որը 2022 թվականին էլ սպառնում էր ահաբեկչությամբ՝ դպրոց ու մանկապարտեզ գրավել:
Ահաբեկչական հայտարարություններ անող Գալեյանը ժամանակին չպատժվեց, իսկ անպատժելիությունը ծնում է նոր հանցանքներ։ Մանկապարտեզ ու դպրոց գրավել ցանկացող Գալեյանի թիմն այսօր էլ որոշել է մարդ առևանգել։ Այստեղ հարցն այն չէ, թե ում են ցանկացել առևանգել ահաբեկչական հակումներ ունեցող և անհավասարակշիռ պահվածքով աչքի ընկնող անձինք, հարցն այն է, որ այդ մարդկանց համար ահաբեկչությունը դարձել է սկզբունք։
Խոշոր հաշվով Գալեյանը և նրա նման մարդիկ որոշ քաղաքական ուժերի համար դարձել են ահաբեկչական գործիք, որոնց օգտագործում են՝ երկրում անկայունություն և քաոս առաջացնելու համար։ Գալեյանների նմաններն օր առաջ պետք է մեկուսացվեն, հակառակ դեպքում՝ երկրում կունենանք նոր նաիրի հունանյաններ, որոնց համար քաղաքականությունը սեփական մոլագար գաղափարներն առաջ տանելու և երկիրը քայքայելու միջոց է։