Ռուսական ներխուժումն Ուկրաինա արդեն երրորդ օրն է. Երկրի տարբեր շրջաններում թեժ մարտեր են ընթանում Ուկրաինայի զինված ուժերի և ռուսական բանակի միջև։ Հաղորդվում է, որ մարտեր են ընթանում Կիևում, որտեղ ներթափանցել են ռուսական դիվերսիոն խմբեր, ինչպես նաև Խարկովի մոտ, Դոնբասում, Սումիի շրջանում, Խերսոնի շրջանում և այլ վայրերում։
Ուկրաինական կողմը պնդում է, որ զավթիչ բանակը հրետակոծում է ոչ միայն զինվորականներին, ինչպես ռուսներն են ասում, այլ նաև քաղաքացիական օբյեկտները, խաղաղ բնակչության շրջանում կան զոհեր։
ԱՄՆ-ը, ԵՄ-ն, Մեծ Բրիտանիան և Կանադան անձնական պատժամիջոցներ են սահմանել Վլադիմիր Պուտինի և Սերգեյ Լավրովի դեմ։ Բացի այդ, ընդունվել է Ռուսաստանի դեմ նոր կոշտ տնտեսական պատժամիջոցների փաթեթ։
Կիևի բազմաթիվ բնակիչներ գիշերել են մետրոյում։ Կիևի մետրոպոլիտենի կարմիր գիծն այժմ փակ է և օգտագործվում է միայն կացարանի համար, մյուս երկու գծերն աշխատում են բնականոն ռեժիմով։
Խարկովի շրջանային ռազմական-քաղաքացիական վարչակազմի ղեկավար Օլեգ Սինեգուբովը Telegram-ում հայտնել է, որ փետրվարի 25-ին ռուսական զորքերը շատ մեծ կորուստներ են կրել՝ հարյուրից ավելի տեխնիկա և հարյուրավոր սպանված զինվորներ։ Եղել են քաղաքի պաշտպանությունը ճեղքելու դեպքեր։ Ռուսական մի քանի տանկեր մտել են Խարկով, որից հետո դրանք ոչնչացվել են։
Ուկրաինայի նախագահ Վլադիմիր Զելենսկին տեսաուղերձ է ձայնագրել նախագահի նստավայրի մոտ։ Նա նշել է, որ աշխատանքի է:
«Հիմա շատ կեղծ տեղեկություններ են հայտնվել ցանցում, իբր ես կոչ եմ անում մեր բանակին վայր դնել զենքերը, տարհանում է կատարվում, վերջ, ես այստեղ եմ, մենք զենքը վայր չենք դնի, մենք պաշտպանելու ենք մեր պետությունը».
