Կառավարության այսօրվա նիստում ՝ անդրադառնալով Պարեկային ծառայության գործունեությանը, վարչապետ Նիկոլ Փաշինյանը նշեց, որ Հայաստանում Պարեկային ծառայության գործունեության 7 ամիսների ընթացքում վարչական պատասխանատվության են ենթարկվել մի շարք պաշտոնյաներ:
«Երրորդ հանրապետության պատմության ընթացքում ոչ մի դեպք չունենք, որ այդ մակարդակի պաշտոնյաները, նրանց ընտանիքի անդամները ենթարկվեն պատասխանատվության: Ոստիկանության պետից ներողություն խնդրելով, ասեմ, որ ՀՀ ոստիկանության պետի ընտանիքի անդամի մեքենան տարվել է հատուկ պահպանվող տարածք: Համապատասխան տուգանքը վճարվել է»,-ասաց Նիկոլ Փաշինյանը:
ՀՀ վարչապետը ներկայացնելով վերջին 7 ամիսների ընթացքում Պարեկային ծառայության աշխատանքի արդյունքները՝ ծառայության գործունեությունը գնահատել է դրական:
Ոստիկանության պետ Վահե Ղազարյանն էլ անդրադառնալով թեմային տեղեկացրեց, որ Պարեկային ոստիկանները բերման են ենթարկում այն անձանց, ովքեր խախտում կատարելուց հետո իրենց կաշառք են առաջարկում։
«2021 թվականի վեց ամիսների ընթացքում ոստիկանության պարեկային ծառայության կողմից արձանագրվել է կաշառք տալու 4 դեպք։ Բոլոր դեպքերով հարուցվել է քրեական գործ։ Երեկ մենք ունեցանք նոր թարմ դեպք Երևան քաղաքի Իսակովի պողոտայում։ Քաղաքացին ոչ սթափ վիճակում խախտում կատարելու համար փորձել է կաշառք առաջարկել, փաստի առթիվ ներկա պահին ոտսիկանության կենտրոնի բաժնում նախապատրաստվում են նյութեր»,- նշեց ոստիկանության պետը։
