Ադրբեջանում ԱՄՆ-ի և Ֆրանսիայի դեսպաններն այսօր՝ օգոստոսի 27-ին, հրաժարվել են Շուշի այցելելուց:
44-օրյա պատերազմի հետևանքով ադրբեջանական վերահսկողության ներքո հայտնված քաղաք այսօր պաշտոնական Բաքվի հրավերով 40 դիվանագետ է այցելել, որտեղ նրանց մասնակցությամբ կոնֆերանս է կայացել:
Ադրբեջանական կողմի ԱՄՆ-ի ու Ֆրանսիայի դեսպանների՝ այցից հրաժարումը «անհարգալից վերաբերմունք է Ադրբեջանի տարածքային ամբողջականության նկատմամբ»։
«Այսօր Շուշիում չկան Ադրբեջանում Ֆրանսիայի և ԱՄՆ դեսպանները։ Նրանք բացահայտորեն անտեսել են ադրբեջանական կառավարության հրավերը: Մենք դա ընդունում ենք որպես մեր տարածքային ամբողջականության նկատմամբ ոչ հարգալից վերաբերմունք։ Որովհետև, այդ երկրների կարծիքով, հակամարտությունը դեռևս չի ավարտվել»,- APA գործակալության փոխանցմամբ հայտարարել է Ադրբեջանի նախագահի՝ արտաքին քաղաքականության հարցերով օգնական Հիքմեթ Հաջիևը։
Հաջիևը նաև հայտարարել է, թե Ֆրանսիան և ԱՄՆ-ը՝ որպես Մինսկի խմբի համանախագահ երկրներ, «որևէ ավանդ չեն ունեցել հակամարտության կարգավորման մեջ, այլ ընդամենը վատնել են 30 տարի»։
Հիշեցնենք՝ Ադրբեջանում Ֆրանսիայի և ԱՄՆ-ի դեսպանները հրաժարվել էին Շուշի այցելությունից նաև նախորդ տարվա հուլիսին, երբ այցին չէր մասնակցել նաև Ռուսաստանի դեսպանը։ Այդ ժամանակ ադրբեջանական լրատվամիջոցները դեսպանների այս քայլը «դեմարշ» էին որակել և երեք գերտերություններին մեղադրել «հայամետ» դիրքորոշման մեջ։
Թերևս, այս քայլի պատճառն այն է, որ հիշյալ 3 երկրները ԵԱՀԿ Մինսկի խմբի համանախագահներն են և պարտավոր են պահպանել չեզոքություն: Թեպետ Ադրբեջանը վերջին շրջանում քանիցս հայտարարել է, որ ԵԱՀԿ Մինսկի խմբի գործունեությունն ավարտված է, այնուամենայնիվ, Հայաստանն այս կարծիքը չի կիսում, իսկ ՀՀ արգործնախարարությունն էլ օրերս հայտարարել է, որ ԵԱՀԿ Մինսկի խմբի համանախագահությունն ունի միջազգային մանդատ՝ աջակցելու Լեռնային Ղարաբաղի հակամարտության տեւական ու համապարփակ կարգավորմանը, և այս մանդատը որևէ մեկը չի չեղարկել:
