Մոսկվայում հոկտեմբերի 12-ին մեկնարկել է ՀՀ վարչապետ Նիկոլ Փաշինյանի և Ռուսաստանի Դաշնության նախագահ Վլադիմիր Պուտինի հանդիպումը։
Ողջունելով Նիկոլ Փաշինյանին՝ Պուտինը նշել է որ Հայաստանի վարչապետի հետ մշտական կապի մեջ է հեռախոսի միջոցով, սակայն անձնական հանդիպումները, ըստ Ռուսաստանի նախագահի, «մշտապես արդյունավետ են անցնում՝ ցանկալի արդյունքներին հասնելու տեսանկյունից»։
«Հուսով եմ, որ այդպես կլինի նաև այս անգամ»,- նշել է ՌԴ նախագահ Վլադիմիր Պուտինը։
Նիկոլ Փաշինյանը շնորհակալություն է հայտնել Վլադիմիր Պուտինին ընդունելության համար եւ նշել, որ նման հանդիպումները եւ քննարկումները փաստում են երկու երկրների ղեկավարների քաղաքական երկխոսության բարձր դինամիկայի մասին։ Նա անդրադարձավ նաև տարածաշրջանային խնդիրներին։
«Իհարկե, ներկայումս մեր տարածաշրջանում և ամբողջ աշխարհում տեղի են ունենում դինամիկ պրոցեսներ, և շատ կարևոր է, որպեսզի դաշնակիցները հաճախ հանդիպեն, զրուցեն, ինչպես Դուք ասացիք՝ «համեմատեն ժամացույցները»: Իհարկե, ցավոք առայժմ չի կարելի ասել մեր տարածաշրջանում իրավիճակի լիարժեք կայունացման մասին: Ինչպես Դուք նկատեցիք, ԼՂ հակամարտությունը մնում է չլուծված, և հասկանալի է, որ հակամարտության կարգավորման ու ընդհանրապես՝ մեր տարածաշրջանում անվտանգության ապահովման հարցում առանցքային դեր է խաղում Ռուսաստանը, որ հանդիսանում է նաև ԵԱՀԿ ՄԽ համանախագահող երկիր: Իհարկե, այս բոլոր հարցերը շատ կարևոր են, առանցքային հարցեր են, և ես շատ ուրախ եմ այս ամբողջ օրակարգը ձեզ հետ քննարկելու առիթի համար»,- նշել է Փաշինյանը:
