Գլոբալ ցեղասպանությունների կանխարգելող ֆորումը, փաստորեն, համընկավ ևս մի ցեղասպան գործարքի կամ գործարքի դրսևորման հետ։ Այս մասին նշել է ԱՀ ԱԳՆ ժամանակավոր պաշտոնակատար Դավիթ Բաբայանը՝ անդրադառնալով Լաչինի միջանցքը փակելու ադրբեջանական հերթական փորձին։
«Ճանապարհը միակն է, որն, ըստ էության, կապում է և՛ Հայաստանի, և՛ արտաքին աշխարհի, ինչպես նաև Արցախի Շուշիի շրջանի մի քանի գյուղերի, մայրաքաղաք Ստեփանակերտի հետ , փաստորեն ադրբեջանական կողմը հերթական անգամ փակել է և կաթվածահար է փորձում անել Արցախը։ Մենք իսկապես չկարողացանք վերադառնալ, որովհետև Ֆրանսիա պաշտոնական այցից հետո ճանապարհին արդեն Գորիսում ստիպված կանգեցինք, մեկ օր մնացինք, քանի որ ճանապարհը փակ էր»,- Երևանում հրավիրված ասուլիսի ժամանակ հայտարարել է ԱՀ ԱԳՆ ժամանակավոր պաշտոնակատար Դավիթ Բաբայանը։
«Արցախը շարունակում է մարտնչել և շարունակելու է, մենք բոլորս հիմա պետք է միասնական ճակատով հանդես գանք և, օգտվելով առիթից, ուզում եմ կոչ անել ամբողջ հայությանը, որպեսզի միասնական ջանքերով մեր ձայնը լսելի դարձնենք միջազգային տարբեր ատյաններում։ Միջազգային հանրությանն էլ կոչ ենք անում քայլեր ձեռնարկել և զսպել Ադրբեջանի հայատյաց և մարդատյաց ցեղասպան քաղաքականության դրսևորումը և ամեն ինչ անել, որ ճանապարհը բացվի»,- նշել է Բաբայանը