Ըստ Metaratings.ru կայքի՝ գերմանական Բունդեսլիգան ներկայացնող «Բայերը», «Ֆրայբուրգը» և Մյունխենգլադբախի «Բորուսիան» ակտիվորեն հետևում են «Կրասնոդարի» և Հայաստանի հավաքականի կիսապաշտպան Էդուարդ Սպերցյանի խաղին:
Ըստ կայքի՝ ֆուտբոլիստը հայտնվել է նաև իտալական ակումբների հետաքրքրությունների շրջանակում, որոնցից մեկը Միլան քաղաքը ներկայանող մյուս ակումբն է՝ «Ինտերն»-ը:
Ինչպես հայտնում է մեր աղբյուրը, Բունդեսլիգայի ակումբների սկաուտները գալիս, հետևում էին ֆուտբոլիստի խաղին՝ ի տարբերություն իտալական ակումբների: Ֆուտբոլիստի առաջնահերթությունը առաջիկա տրանսֆերային պատուհանի ընթացքում եվրոպական թոփ-5 լիգաներ տեղափոխվելն է:
Ավելի վաղ Metaratings.ru հաղորդել էր, որ «Բորուսիան» ամռանը փորձել է պայմանագիր կնքել Սպերցյանի հետ, սակայն ակումբները համաձայնության չեն հասել: Այժմ գերմանական թիմը վերսկսել է հետաքրքրություն ցուցաբերել տրանսֆերի ուղղությամբ։
Ընթացիկ մրցաշրջանում 22-ամյա կիսապաշտպանը 21 հանդիպում է անցկացրել Ռուսաստանի առաջնությունում՝ դառնալով 9 գոլի և 9 գոլային փոխանցման հեղինակ:
Հիշեցնենք, որ իտալական La Gazzetta dello Sport պարբերականը գրել էր, որ «Միլանը» պատրաստվում է տրանսֆերային առաջարկ կատարել «Կրասնոդարի» հայազգի կիսապաշտպան Էդուարդ Սպերցյանի համար։ Նշվում էր, որ «ռոսոներիները» 8 մլն եվրո են պատրաստվում առաջարկել Հայաստանի ազգային հավաքականի ֆուտբոլիստի համար։
