Նոյմբերի 20-ին Կատարում մեկնարկեց ֆուտբոլի աշխարհի՝ 2022 թվականի առաջնությունը, որը կտևի մինչև դեկտեմբերի 18-ը։ 32 թիմեր կմրցեն ութ խմբերում։
Բացման մեկնարկային խաղում տանտերերի՝ Կատարի հավաքականը Էլ Խաուրի «Էլ Բայթ» մարզադաշտում A խմբի 1-ին տուրում 0-2 հաշվով պարտվեց Էկվադորի հավաքականին։
Այսօր կկայանա ևս երեք հանդիպում։ Բ խմբում կմրցեն Անգլիայի և Իրանի հավաքականները: Խաղը կկայանա «Խալիֆա Ինթերնեյշնըլ» մարզադաշտում՝ Երևանի ժամանակով 17։00-ին։
Ժամը 20։00-ին «Ալ-Թումամա» մարզադաշտում կկայանա Ա խմբի երկրորդ՝ Նիդերլանդներ-Սենեգալ հանդիպումը։
Մրցաշարային օրվա վերջին հանդիպումը տեղի կունենա երեկոյան՝ 23։00-ին, ԱՄՆ-ի և Ուելսի միջև՝ «Ահմեդ բին Ալի» մարզադաշտում։
Հիշեցնենք որ առաջին անգամ Աշխարհի գավաթն անցկացվում է Արաբական աշխարհում և առաջին անգամ մահմեդական մեծամասնությամբ երկրում։ Երկրորդ անգամ Արշխարհի գավաթը կխաղարկվում է Ասիայում 2002 թվականի առաջնությունից հետո, որն անցկացվեց Հարավային Կորեայում և Ճապոնիայում։
Ֆուտբոլի աշխարհի այս առաջնությանը վերջին անգամ կմասնակցի 32 հավաքական, քանի որ 2026 թվականի առաջնությունից սկսած մասնակցելու է 48 հավաքական։ Աշխարհի գործող չեմպիոնը Ֆրանսիան է։