30 տարվա դադարից հետո Այգեվանը ներկայանալու է նոր մանկապարտեզով. Սպասված կառույցը կգործի մարտ ամսից, փետրվարին կավարտվեն շինարարական աշխատանքները։ Բնակիչներն ուրախությամբ են նշում, որ փոքրիկների ձգտումը մանկապարտեզ հաճախելու, արդեն այդքան մոտ է իրականությանը։
Մոդուլային մանկապարտեզը նախատեսված է 144 երեխայի համար։ Այգեվանի գունավոր անկյունը աչք է շոյում գյուղ մտնելուն պես։ Այն կառուցվում է պետական բյուջեի ֆինանսավորմամբ գյուղի կոնտրոնական հատվածում 7000 քմ տարածքի վրա։
Վարչական ղեկավար Հարություն Սահակյանը մանրամասնում է. «Մանկապարտեզը նախադպրոցական կրթության կարևոր բաղկացուցիչ մասերից մեկն է։ Նախնական տվյալներով կհաճախի 90 երեխա, բայց նախատեսված է 144 երեխայի համար։ Հիմա կատարվում են ներքին հարդարման աշխատանքներ»:
Այգեվանի հին մանկապարտեզի մասին զրուցեցինք մանկավարժ-դաստիարակ տիկին Աիդայի հետ, որն աշխատել է այդ կառույցում շուրջ քսան տարի.
«Մանկապարտեզում աշխատել եմ 1976-96թթ., հիշում եմ, երբ 1996թ. Նոր տարվա երեխաների հանդեսից հետո մանկապարտեզը հարկադրաբար փակվեց` ֆինանսավորում չունենալու պատճառով. Այդ տարիներին կառույցը գազաֆիկացված չէր, վառարաններ էինք օգտագործում, իսկ շենքի հնարավորությունները, բնականաբար, այդքան շատ չէին, որքան այս տարի կառուցվող մանկապարտեզինը»:
Նորակառույց մանկապարտեզում գործելու է արևի էներգիայով սնվող ջրատաքացման համակարգ, ունենալու է մշտական ջուր, կառուցվել են պոմպակայան, ռեզերվուարներ, իսկ բակում գործելու է մեծ գունավոր խաղահրապարակը։
Մոդուլային կառույցի պատվիրատուն քաղաքաշինության կոմիտեն է, նախագծային արժեքը կազմում է 820 մլն դրամ։ Բացի այդ , մանկապարտեզին կից կառուցվել է 300 հոգու համար նախատեսված ապաստարան։
Տիկին Աիդան զրույցում առանձնացրեց այն փաստը, որ տարիներ շարունակ գյուղի բնակիչների մի մասն է հնարավորություն ունեցել երեխաներին ուղարկելու հարակից համայնքների մանկապարտեզներ, իսկ այսպես արդեն փոքրիկ բնակիչները ստիպված չեն լինի գյուղից հեռանալ։
Մանկապարտեզի կառուցումը կյանքի փոփոխություն է բերել բնակիչներին, քանի որ իրականություն է դառնում իրենց վաղեմի երազանքը։
Հեղինակ՝ Հեղինե Մխիթարյան, ՀՊՄՀ Լրագրության բաժին
