ԱԺ նախագահ Ալեն Սիմոնյանն անդրադարձել է Էկոնոմիկայի նախարարությունում և «Սիներջի» ընկերությունում հայտնաբերված չարաշահումների գործին, որի շրջանակներում կալանավորվել էր նաև իր եղբոր կինը։ Սիմոնյանի խոսքով, ինքը վստահ է, որ մեղադրանքը սխալվել է, և իր բարեկամի վերաբերյալ ժամանակի ընթացքում կպարզվի դա. «Բայց դա չի նշանակում, որ համակարգը, պետությունը պետք է կուլիսային արդարադատություն իրականացնի։ Դա անընդունելի է»․ լրագրողների հետ զրույցում ասել է նա։
Սիմոնյանը շեշտել է, որ ՔՊ խմբակցությունը ոչ թե խառնվել է գործին, թե ով է մեղավոր, ով ոչ, այլ խափանման միջոցի վերաբերյալ միջնորդություն է ներկայացրել. «Ես պնդում եմ, կարծում եմ, որ անընդունելի է, երբ դատարանը որոշում է կայացնում որևէ մանկահասակ երեխու մորը կալանավորել՝ այն դեպքում, երբ կան խափանման այլ միջոցներ։ Ես գիտեմ՝ կա խոսակցություն, որ նման դեպք էլի է եղել։ Ես, առիթից օգտվելով, ներողություն եմ խնդրում, որ չեմ իմացել դրա մասին, դա իմ մեղավորությունն է եղել։ Այդ դեպքում էլ կանեի նույնը, ինչ՝ այս դեպքում»։
Լրագրողի դիտարկմանը՝ «հրահա՞նգ է եղել», նա արձագանքել է. «Ես չեմ կարծում, որ նման բան է տեղի ունեցել։ Եթե նման բան է տեղի ունեցել, ցավում եմ։ Իսկ դատարանի որոշումը համարում եմ անթույլատրելի»։
Սիմոնյանը, լրագրողի հարցին, թե եղբոր կնոջը կալանավորելը նշանակում է, որ վարչապետն իրեն թիրախավորել է, նա նշել է. «Ոչ, չի նշանակում։ Եթե վարչապետը, որպես կուսակցության ղեկավար, ինձ ասելիք ունենա, մշտապես շփման մեջ ենք, ազնիվ, անկեղծ շփման մեջ»։
Ըստ Սիմոնյանի, վարչապետի հետ իր հարաբերություններն ինստիտուցիոնալ և ընկերական հիմքի վրա են. «Նման բան պնդելը նշանակում է չիմանալ մեր հարաբերությունների մասին»։
