Հրազդանի կիրճում մարզվող քաղաքացիների անվտանգությունը ապահովելու և առողջ ապրելակերպը խթանելու համար շաբաթ և կիրակի օրերին կիրճում մեքենաների երթևեկությունը արգելելու հնարավորություն պետք է ստեղծել՝ առաջարկելով արգելքի կիրառման հատվածը, ժամերը և եղանակը։ Այս մասին Երևանի քաղաքապետարանի գործակարգավարական նիստի ժամանակ ասաց քաղաքապետ Տիգրան Ավինյանը։ Ըստ նրա հարցը մեկ անգամ արդեն քննարկվել է, և պետք է իրականացնել։
Քաղաքապետը հորդորեց ֆիքսել այդ հանձնարարականը, ապա հավելեց՝ պետք է որոշակի հնարավորություններ ստեղծել, եթե կարիք կա, նույնիսկ օրենսդրական, որպեսզի հեռակառավարվող թաքնված շլագբաումներ տեղադրել, որովհետև անընդհատ վարչարարություն անելը էֆեկտիվ չէ, եթե կարելի է շաբաթ-կիրակի օրերին ուղղակի ճանապարհը փակել:
Երևանի տրանսպորտի վարչության պետն ասաց, որ մեկ-երկու օրվա մեջ ճանապարհի կահավորումը պատշաճ տեսքի կբերվի, ու պատշաճ հսկողություն կիրականացվի, պարեկների և ՃՈ աշխատակիցների հետ էլ կաշխատեն, որ հասկանան՝ ինչպես են կարգավորում խնդիրը։
