Հարավային Կովկասում արժանապատիվ խաղաղության համար կենսական անհրաժեշտություն է ապահովել ուժի կիրառման ու այլատյաց քաղաքականության բացառումը. հայտարարել է ԱԳ նախարար Արարատ Միրզոյանը՝ Հունգարիայի պաշտոնակցի հետ ասուլիսին։
«Մենք արդեն ականատես ենք եղել դրանց դրսևորումներին։ Ընդամենը մեկ ամիս առաջ Լեռնային Ղարաբաղում ավարտին հասցվեց էթնիկ զտման քաղաքականությունը, ավելի քան 100 հազար հայեր ստիպված եղան իրենց կյանքը փրկելու համար բռնի տեղահանվել, լքեցին իրենց պատմական հայրենիքը ու, որպես փախստական, ապաստան են գտել Հայաստանում»,- ասել է Միրզոյանը։
ԱԳ նախարարի խոսքով՝ տարածաշրջանում հարատև խաղաղությունը պահանջում է տարածաշրջանի բոլոր երկրների հանձնառություն ու գործուն քայլեր, հրաժարում առավելապաշտական նկրտումներից։ «Դա հնարավոր է, եթե միանշանակ լինի միմյանց տարածքային ամբողջականության ճանչումն ու իրականացվի երկու երկրների սահմանների դելիմիտացիա»,- շեշտել է նա։
