Շվեդիայում պատմական այցով գտնվող Իսրայելի արտգործնախարար Էլի Կոհենը մայիսի 15-ին հանդիպել է Շվեդիայի արտաքին գործերի նախարար Թոբիաս Բիլստրյոմի հետ: Հանդիպմանը նա հայտարարել է Իսրայելի և Սկանդինավյան թագավորության հարաբերություններում նոր էջ բացելու մասին 20 տարվա քաղաքական տարաձայնություններից և բարձր մակարդակում երկխոսության բացակայությունից հետո:
Կոհենը դարձել է Իսրայելի առաջին արտգործնախարարը, որ Շվեդիա է այցելել վերջին 22 տարվա ընթացքում։
«Մենք Իսրայելի և Շվեդիայի հարաբերություններում նոր էջ ենք բացում երկար տարիներ Իսրայելի նկատմամբ քննադատական քաղաքականություն վարելուց հետո:
Այս այցը Ստոկհոլմ Իսրայելի արտգործնախարարի առաջին այցն է 2001 թվականից ի վեր, և դա նշանավորում է երկու երկրների միջև հարաբերությունների ուղղության փոփոխություն»,-ինչպես հաղորդում է «Արմենպրես»-ը , վկայակոչելով «ՌԻԱ Նովոստի»-ին, ասել է Կոհենը: Նրա խոսքերը մեջբերել է Իսրայելի ԱԳՆ մամուլի ծառայությունը։
Երկու երկրների արտաքին գործերի նախարարներն ընդգծել են Իսրայելի նկատմամբ Շվեդիայի մոտեցումների նկատելի փոփոխությունն ինչպես երկկողմ, այնպես էլ միջազգային հարթակներում, ինչպես նաև քննարկել են երկրների միջև տնտեսական կապերի ամրապնդման ուղիները։
Կոհենը և Բիլստրյոմն անդրադարձել են Շվեդիայի՝ ՆԱՏՕ-ին անդամակցելու ակնկալիքներին: Ըստ Իսրայելի նախարարի՝ դա կարող է հիանալի հնարավորություն լինել Իսրայելի համար ամրապնդելու տնտեսական կապերը Շվեդիայի հետ և ընդլայնելու երկրների միջև առևտուրը անվտանգության, նորարարության և ֆինանսական տեխնոլոգիաների բնագավառներում:
