Աազգային ժողովում լրագրողների հետ ճեպազրույցի ժամանակ «Իմ քայլը» խմբակցության ղեկավար Լիլիթ Մակունցն ասել է, որ իր կարծիքով Սյունիքում տեղի ունեցածը ակցիաներ էին՝ ուղեկցված խուլիգանական դրսևորումներով։
«Սյունիքի մարզում տեղի ունեցածը, եթե ոմանք մեկնաբանում են քաղաքական ակցիա, ես կարծում եմ՝ դրանք ակցիաներ էին՝ ուղեկցված խուլիգանական դրսևորումներով»,- նշեց Մակունցը։
Նա նաեւ ասաց, որ դժգոհելու առիթ միշտ կա հասարակության մոտ ու լինելու է բոլոր իշխանությունների պարագայում։
«Այստեղ հարցն այն է, որ կա որոշակի միտում Հայաստանի Հանրապետությունը բաժանելու մասերի։ Եվ դա նկատվում է նաև առանձին, այո, ուղղորդված խմբակների կողմից։ Դա, իհարկե, չի կարող ընդունելի լինել որևէ երկրի քացաքական ղեկավարության ու իրավապահ համակարգի կողմից»,- ասաց նա։
Մակունցը նաեւ ավելացրեց, որ չի կարող անուններ հնչեցնել, բայց հետևելով իրադարձություններին և տեսնելով՝ ինչպիսի գործողություններ են ծավալվում, կա նման տպավորություն, որ այդ ամենն ուղղորդված է։
