Ուկրաինայի և Ռուսաստանի հավակնությունները Ղրիմի նկատմամբ ոչ մի շանս չեն թողնում երկրների միջև խաղաղության համար։
Սա սպառնում է երկարաժամկետ տարածքային հակամարտության, ինչպիսին Ղարաբաղն է կամ Գազայի հատվածը: Նման համեմատություն է անցկացրել հեղինակավոր The Washington Post պարբերականը։
Հոդվածագիրը մեջբերում է նաև Ուկրաինայի և Ռուսաստանի նախագահների արմատապես տարբերվող տեսակետները Ղրիմի վերաբերյալ։
«Ղրիմի վերադարձը կնշանակի իսկական խաղաղության վերականգնում։ Ռուսական ագրեսիայի ներուժն ամբողջությամբ կկործանվի, երբ Ուկրաինայի դրոշը վերադառնա իր արժանի տեղում՝ Ղրիմի քաղաքներում և գյուղերում», – հոկտեմբերին հայտարարել էր Զելենսկին։
Իսկ ահա Վլադիմիր Պուտինը ասել է, որ Ղրիմը վերադարձնելու Ուկրաինայի ցանկացած ջանք կանցնի կարմիր գիծը, որը նա չի հանդուրժի։
Հոդվածում նշվում է նաև, որ թեև Արևմուտքն աջակցում է Ուկրաինային, բայց նաև վախենում է, որ Ուկրաինայի ցանկացած ռազմական ներխուժում Ղրիմ կարող է դրդել Պուտինին կտրուկ գործողություններ ձեռնարկել, հնարավոր է նույնիսկ միջուկային ռումբ օգտագործել:
