ՊԵԿ նախագահ Ռուստամ Բադասյանը լրագրողների հետ ճեպազրույցում հայտարարել է, թե առաջիկայում կլինեն նոր բացահայտումներ։
Նրա խոսքով՝ արդեն առգրավված սերվերներից տասնյակ միլիարդ դրամների ստվերային շրջանառություն է բացահայտվել. «Ոչ միայն «Նոր Զովքում»․ բազմաթիվ են նման տնտեսվարող սուբյեկտները։ Չի բացառվում, որ 100 մլրդ և ավելի ստվերային շրջանառություն դուրս բերվի միայն այն դեպքով, որ հայտնաբերվել են սերվերներ»։
Բադասյանը հարցին, թե ինչու է միայն «Նոր Զովքի» սեփականատերը ձերբակալվել, ասել է. «Ձերբակալելու որոշումը կայացնում է քննիչը՝ հիմքերի առկայության դեպքում, քրեական դատավարության շրջանակներում։ Բոլոր դեպքերում, երբ կլինեն օրենսդրությամբ սահմանված հիմքեր, կլինեն նույնատեսակ գործողություններ։ Խոսքը ոչ միայն սուպերմարկետների մասին է»։
Բադասյանը նշել է, թե տասնյակ միլիարդավոր թաքցված շրջանառություն եղել է շինարարական և այլ ընկերություններում. «Քաղաքական թիմի թիրախում որևէ բիզնես չկա։ ՊԵԿ-ը հավասար մոտեցումներով, իր լիազորությունների շրջանակներում ո՛ր դեպքում հայտնաբերի նման երևույթներ, խիստ հետևանքներ են լինելու»,- ասել է նա։
Նա կոչ է արել տնտեսվարողներին՝ աշխատել օրինականության դաշտում և բացառել ապօրինի երևույթները։
