Հ ԱՆ Հիվանդությունների վերահսկման և կանխարգելման ազգային կենտրոնի փոխտնօրեն Գայանե Սահակյանը հայտարարել է, որ շատ քաղաքացիներ ականջալուր են ՀՀ առողջապահության նախարարության հորդորներին և այս օրերին շտապում են լրացնել կարմրուկի դեմ պատվաստումային բացը:
Նրա խոսքով վերջին տվյալների համաձայն՝ մարտի 4-ից հետո, երբ գրանցվեց կարմրուկի այս տարվա առաջին դեպքը, ունենք 3 հազարից ավելի պատվաստում:
«Պատվաստվողները ներկայացնում են տարբեր տարիքային խմբեր՝ երեխաներ, մեծահասակներ: Պատվաստվել են նաև 300-ից ավելի բուժաշխատողներ, մոտ 300 սերտ կոնտակտավորներ: Տեսնում ենք, որ պատվաստման պահանաջարկը բարձր է, իրոք քաղաքացիները դիմում են պատվաստվելու»,- նշել է Գայանե Սահակյանը:
Նա վստահեցրել է, որ Հայաստանն ապահովված է անհրաժեշտ քանակի պատվաստանյութերով։
Ըստ ԱՆ տվյալի՝ մարտի 10-ի՝ ժամը 10:00-ի դրությամբ, Հայաստանի Հանրապետությունում կարմրուկի լաբորատոր հաստատված դեպքերի թիվը հասել է 46-ի։ Նրանցից 15-ը հոսպիտալացված է, 17-ը չի հոսպիտալացվել, 14-ը դուրս է գրվել:
Հիվանդների առողջական վիճակը գնահատվում է միջին ծանրության:
46 վարակվածներից 43-ը պատվաստված չէ, 3-ը պատվաստված է մեկ դեղաչափով:
Հիշեցնենք, որ պատվաստումների ազգային օրացույցով կարմրուկի դեմ պատվաստումները նախատեսված են 1 և 4-6 տարեկան երեխաների համար:
Կարմրուկի դեմ պլանային պատվաստումներ չստացած երեխաների ծնողներին առողջապահության նախարարությունը հորդորում է դիմել հաշվառման պոլիկլինիկա և պատվաստել երեխաներին:
Միաժամանակ, պատվաստման են ենթակա նաև կարմրուկով հիվանդների հետ շփված այն անձինք, ովքեր չունեն կարմրուկի դեմ 2 դեղաչափ պատվաստում:
