Լեռնային Ղարաբաղի հիմնախնդրի կարգավորումը պետք է տեղի ունենա ԵԱՀԿ Մինսկի խմբի համանախագահության ձեւաչափի շրջանակներում։ Այս մասին լրագրողների հետ ճեպազրույցում նշեց ԱԽ քարտուղար Արմեն Գրիգորյանը։
«Լեռնային Ղարաբաղի հիմնախնդրի կարգավորումը պետք է տեղի ունենա ԵԱՀԿ Մինսկի խմբի համանախագահության ձեւաչափի շրջանակներում և մենք պետք է խաղաղ ճանապարհով խնդրին լուծում գտնենք։ Եվ ցանկացած գործընթաց, որը կարող է խաղաղ կարգավորմանը խանգարել, մեզ համար մտահոգիչ է։ Մենք կարծում ենք, որ Մինսկի խմբի համանախագահող երկրները ունեն բոլոր այն լծակները և հնարավորությունները՝ ակտիվ լինելու դեպքում կանխել ռազմական ճանապարհով որևէ քայլ ձեռնարկելը»,- ասաց նա։
Անդրադառնալով Արցախում ռուս խաղաղապահների տեղակայման հարցին, ԱԽ քարտուղար Արմեն Գրիգորյանն ասաց․
«Մեր ընկալումը շարունակում է նույնը մնալ, մենք բազմիցս հայտարարել ենք, որ մենք կարծում ենք՝ քանի դեռ Լեռնային Ղարաբաղի հիմնախնդիրը չի լուծվել, այնտեղ պետք է խաղաղապահներ տեղակայված լինեն, որպեսզի կարողանանք երկարաժամկետ լուծումներ գտնել։ Քանի դեռ դա չկա, խաղաղապահների գործունեությունն այնտեղ անհրաժեշտություն է, և Հայաստանը շարունակելու է աշխատել, որպեսզի խաղաղապահները տեղակայված լինեն այնտեղ և մնան այնքան ժամանակ, մինչև մենք խնդրին լուծում կգտնենք»։