Բնության համաշխարհային հիմնադրամի հայաստանյան մասնաճյուղը (WWF-Armenia) տեղեկացնում է, որ «Կովկասյան ազնվացեղ եղջերուի վերաբնակեցումը Հայաստանում» ծրագրի շրջանակներում բուծված ազնվացեղ եղջերուների առաջին խումբը հաջողությամբ բաց թողնվեց բնություն:
հոկտեմբերի 14ին «Դիլիջան» ազգային պարկում տեղի ունեցավ ծրագրի առաջին 3 ազնվացեղ եղջերուների բացթողումը Դիլիջան ազգային պարկ: Պաշտոնական արարողությանը ելույթով ներկայացան ՀՀ Շրջակա միջավայրի նախարար Հակոբ Սիմիդյանը, WWF-Հայաստանի տնօրեն Կարեն Մանվելյանը և Կովկասի բնության հիմնադրամի (CNF) գործադիր տնօրեն Տոբիաս Մյուխմեյերը: Ազնվացեղ եղջերուների բացթողումը զուգորդվեց առցանց մոնիտորինգի հետ, որի միջոցով միջոցառման մասնակիցները հնարավորություն ունեցան հետևել բացթողման ամբողջ գործընթացին: Պաշտոնական արարողությանը հաջորդեց WWF-հայաստանի տնօրեն Կարեն Մանվելյանի հարցազրույցը մամուլին, որի ընթացքում խոսվեց ծրագրի նախաձեռնման, իրագործման, նպատակների ինչպես նաև պոտենցյալ ռիսկերի մասին:
2013 թվականից իվեր Բնության համաշխարհային հիմնադրամի հայաստանյան մասնաճյուղի (WWF-Armenia) և ՀՀ շրջակա միջավայրի նախարարության կողմից իրականացվում է «Կովկասյան ազնվացեղ եղջերուի վերաբնակեցումը Հայաստանում» ծրագիրը՝ Գերմանիայի Դաշնային Հանրապետության (BMZ)՝ KfW Զարգացման բանկի միջոցով, WWF Գերմանիայի, Կովկասի բնության հիմնադրամի (CNF) աջակցությամբ։
Ծրագրի հիմնական նպատակն է ազնվացեղ եղջերուի պոպուլյացիայի վերականգնումը Հայաստանում, որն իրականացվում է «Դիլիջան» ազգային պարկում կառուցված «Կովկասյան ազնվացեղ եղջերուի բազմացման կենտրոնում»՝ ներմուծված բազմացող առանձնյակների և բազմացման կենտրոնում ծնված եղջերուներին բնություն ազատ արձակելու միջոցով։ Երկար տարիներ Հայաստանից բացակայած ազնվացեղ եղջերուն վերադարձավ Հայաստան 2018 թվականին: Ազնվացեղ եղջերուի վերաբնակեցման ծրագրի շրջանակներում Իրանի Իսլամական Հանրապետությունից Հայաստան տեղափոխվեց 14 առանձնյակ (երեք առաձնյակ Հայաստանի Հանրապետությանը նվիրաբերվեց Իրանի Իսլամական Հանրապետության կողմից):
Հարկ է առանձնացնել, որ «Դիլիջան» ազգային պարկի տարածքում ստեղծված ազնվացեղ եղջերուների բազմացման կենտրոնում արդեն իսկ ծնվել է 21 ձագ։ Եղջերուների առաջին խմբի բացթողումից հետո նախատեսվում է տարեկան 8-10 առանձնյակի արձակում բնություն։
