ՀՀ պաշտպանության նախարար Սուրեն Պապիկյանն անդրադարձել է պաշտպանական գծերի վիճակին։
ԱԺ «Հայաստան» խմբակցության պատգամավոր Աննա Գրիգորյանի հարցին ի պատասխան Սուրեն Պապիկյանը նշել է, որ թեև գիծը բնավ իդեալական վիճակում չէ, բայց ոչ ոք աչք չի փակում այդ փաստի վրա.
«Իհարկե, առաջնագծում ամեն ինչ այնպես չէ, ինչպես ես կցանկանայի առաջին հերթին՝ որպես պաշտպանության նախարար։ Բայց ամեն ինչ արվում է, որպեսզի առաջնագիծն օր առաջ ավելի ամուր լինի։ Նախկինում փակ քննարկման ժամանակ ներկայացրել եմ աշխատանքների ծավալն ու բնույթը։ Այդ աշխատանքները շարունակվում են»։
Ըստ Պապիկյանի, պաշտպանական գիծը հատկապես Ադրբեջանի սանձազերծած սեպտեմբերյան մարտերից հետո լիարժեք և ամբողջական կահավորման կարիք ունի: Ըստ նրա՝ վերջին մի քանի տարվա ընթացքում հարյուրավոր կիլոմետրեր դաշտային և բարձրլեռնային ճանապարհներ են կառուցվել են, որոնք տանում են դեպի առաջավոր ամրություններ: Կառուցվել են նաև հարյուրավոր հենակետեր։ Պապիկյանը շեշտել է, որ չպետք է մոռանալ նաև այն փաստը, որ այս ընթացքում եղել են էսկալացիայի որոշ դեպքեր, որոնց արդյունքում գիծը փոխվել է և ոչ հօգուտ Հայաստանի։