«Ինքնիշխան Հայաստան» կուսակցության նախագահ Դավիթ Սանասարյանն անդրադառնալով ՀՀ վարչապետ Նիկոլ Փաշինյանի առցանց ասուլիսի ժամանակ հնչեցրած պատասխաններին գրել է, որ այս իշխանությունը ոչ միայն թերանում է շատ հարցերում, այլև սխալ ռելսերով է տանում երկիրը։
«Չնայած շատ ասելիք կա, բայց հերթով. Փաշինյանն ի պատասխան Բարձունք / Bardzunk-ի տված կարևոր հարցին, թե ինչու պատերազմից հետո հենակետերի ամրաշինական աշխատանքները հավուր պատշաճի չեն արվել, ասում է դե գեներալները քաղաքականությամբ են զբաղվել, նաև այդ պատճառով(համառոտ)։
Լավ, ինչպե՞ս կարելի է այսքան մակերեսային պատասխան տալ։ Պարոն վարչապետ, երբ գերիների մասին խոսում եք, ասում եք պետք է պարզել, թե ինչ հանգամանքներում են գերի ընկել, հիմա իրենց պարտականությունը չկատարած, ու կոնկրետ վերոնշյալ հարցի հետ կապված քանի՞ գերենալ կամ այլ պաշտոնյա է պատասխանատվության կանչվել հենակետային խնդիրները չվերացնելու և իրենց պարտականությունները չկատարելու համար։ Լավ, վերջիվերջո երկրի ղեկավար եք, կարո՞ղ է մի քիչ ավելի ջանք թափեք ու պատասխանատու դիրքերից խոսեք։
Ի՞նչ է նշանակում պատճառ գտնել դիրքերի վատ կահավորվածության, ամրաշինական աշխատանքների թերի լինելու համար, ախր դա հո քաղաքաշինական հարց չէ, որ ժամանակ տաք ուղղեն թերությունները։ Ախր մի անգամ այդ խայտառակող նախադասությունը (համակարգը դիմադրում է) արտաբերել եք ու կրակն ընկել, ինչպե՞ս կարելի է դասեր չքաղել սեփական սխալներից։ Այդ ո՞վ դարձան այդ պաշտոնյաները, որ զինվորի ու երկրի անվտանգության հետ խաղ են անում»,-գրել է Սանասարյանը։