Արտաքին գործերի նախարար Արարատ Միրզոյանը ԱԺ-կառավարություն հարց ու պատասխանի ժամանակ անդրադարձավ տարածված տեղեկություններին, թե իբր նոյեմբերի 9-ին նախատեսվում է ՀՀ վարչապետի և Ադրբեջանի նախագահի հանդիպումը Մոսկվայում, և նախատեսվում է եռակողմ փաստաթղթերի ստորագրում։
«Նախ ուզում եմ ասել, որ այս պահին որևէ հանդիպում այդ ֆորմատով նախատեսված չէ։ Միևնույն ժամանակ, և այս պահին, և գրեթե մշտական բնույթով քննարկվում են տարբեր ֆորմատով տարբեր հանդիպումների առաջարկներ։ Եվ ենթադրաբար այդպիսի հնարավոր հանդիպումների արդյունքում գուցե լինի համաձայնեցված որևէ տեքստի հրապարակում։ Բայց նաև անդրադառնալով եղած հրապարակումներին՝ ուզում եմ ասել, որ այդ երկու քննարկված բովանդակությամբ փաստաթղթերի ստորագրում, անշուշտ, չի նախատեսվում։ Նաև ուզում եմ ավելին ասել՝ այդ հանդիպումները մեր համար բազմաթիվ կիրառական նշանակություններ ունեն, նախ և առաջ ևս մեկ անգամ հնարավորություն կարող են ստեղծել հասցեագրելու հետպատերազմյան ողջ հումանիտար խնդիրների թնջուկը։
Իհարկե, առաջին հերթին ռազմագերիների և բռնի պահվող քաղաքացիական անձանց հնարավոր շուտափույթ ազատ արձակումը, նաև Ադրբեջանի վերահսկողության տակ մնացած տարածքներում Հայաստանի մշակութային ժառանգության, հուշարձանների հարցը և բազմաթիվ այլ հարցեր։ Ավելի լայն առումով այդ հանդիպումները մեր համար հնարավորություն են նաև թուլացնելու լարվածությունը տարածաշրջանում և արդեն ջանքեր գործադրելու ավելի երկարատև կայունություն ու խաղաղություն ապահովելու ուղղությաամբ»,- ասաց Միրզոյանը։