Գյումրիի Սպանդարյան փողոցի՝ Շահումյան փողոցից Հաղթանակի պողոտա ընկած հատվածն այսուհետ կրելու է Հասմիկ Կիրակոսյանի անունը։ Այս մասին տեղեկացնում են Գյումրու քաղաքապետարանից։
ՀՀ մշակույթի վաստակավոր գործիչ, Գյումրու պատվավոր քաղաքացի Հասմիկ Կիրակոսյանն այսօր կդառնար 80 տարեկան։ Ծննդյան օրը տեղի ունեցավ փողոցի անվանակոչման պաշտոնական արարողությունը։ Միջոցառմանը ներկա էին մարզային ու քաղաքային իշխանության ներկայացուցիներ՝ գլխավորությամբ Գյումրի համայնքի ղեկավար Վարդգես Սամսոնյանի, մշակույթի, կրթության ոլորտի ներկայացուցիչներ, Հասմիկ Կիրակոսյանի հարազատները, մտերիմները, գործընկերներ և ուղակի գյումրեցիներ։
Ցուցատախտակի բացման պատիվը տրվեց Գյումրի համայնքի ղեկավար Վարդգես Սամսոնյանին և Գյումրի համայնքի ղեկավարի նախկին տեղակալ Ռուբեն Սանոյանին։ Մինչ բացման հանդիսավոր արարողությունը՝ ողջույնի խոսքով հանդես եկավ Գյումրու համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը։ Իր խոսքում Լիլիթ Թովմասյանն անդրարձավ Հասմիկ Կիրակոսյանի գործունեությանը, ունեցած ավանդին, հատկապես Գյումրու մշակույթի ոլորտում ներդրած ահռելի ջանքերին և թողած մեծ ժառանգությանը։
Փողոցի անվանափոխության հարցը «Բալասանյան դաշինք» խմբակցության ղեկավար Տ.Հովհաննիսյանի կողմից համայնքապետարան մուտքագրվելուց հետո դրվել էր հանրային լսման, դրական եզրակացությամբ հարցն այնուհետ ներկայացվել էր համայնքի ավագանուն և հաստատվել ավագանու կողմից։
Քաղաքի տվյալ հատվածում փակցված հուշատախտակը և ցուցանակները ևս մեկ անգամ կհուշեն բոլորին, որ փողոցին կից շենքում բնակվել է ՀՀ մշակույթի վաստակավոր գործիչ, Գյումրու պատվավոր քաղաքացի Հասմիկ Կիրակոսյանը։