Իշխանությունը պիտի կարողանա մի ինչ-որ «կրիտիկական կետում» կանգ առնելու որոշում ընդունի։ Այս մասին «ֆեյսբուքի» իր էջում գրել է Արցախի ԱԺ նախկին պատգամավոր, վերլուծաբան Վահրամ Աթանեսյանը։
«Ռուսաստանը, օրինակ, միջազգայնորեն հասել էր «Նովոռուսիայի» քաղաքակրթական լեգալացման։ Բայց որովհետեւ ներքին «արգելակները մաշել էր»՝ գնաց Ուկրաինայի արեւելքը անեքսիայի ենթարկելու ճանապարհով։ Իհարկե, շատ հնարավոր է, որ նա այդ նպատակին ռազմական ճանապարհով հասնի։ Բայց այդ դեպքում ՆԱՏՕ-Ռուսաստան «շփման գիծը» կհասնի Դնեպրին։ Գուցե չի լինի նաեւ Ուկրաինա, կհանդիպադրվեն Ռուսաստանը եւ Լեհաստանը։ Դրանից սկզբունքորեն ոչինչ չի փոխվի։ Ինչ-որ «կրիտիկական կետում» պիտի կանգներ Հայաստանը։ Դա Լեռնային Ղարաբաղի անկախության հստակ երաշխիք չէր լինի, բայց Արցախի էթնիկ-քաղաքակրթական ինքնությունը կպահպանվեր ավելի լայն արեալում։ Մի «կրիտիկական կետում»՝ Հայաստանի միջազգայնորեն ճանաչված սահմանին, պիտի կանգ առնի նաեւ Ադրբեջանը։ Հակառակ դեպքում վաղը Հարավային Կովկասը կարող է բաժանվել «գոտիների»։ Բայց արդեն չի լինի ոչ Հայաստան, ոչ Ադրբեջան»,- գրել է Վահրամ Աթանեսյանը։
