Mehr գործակալության հաղորդմամբ՝ Հայաստան-Իրան պատգամավորական բարեկամական խմբի ղեկավար Գևորգ Պապոյանի գլխավորած պատվիրակությունը հանդիպել է Իրանի Մեջլիսի ազգային անվտանգության և արտաքին քաղաքականության հանձնաժողովի փոխնախագահ Իբրահիմ Ազիզիի հետ։
Ազիզին, մատնանշելով երկու երկրների և ժողովուրդների միջև առկա խորը կապերը, նշել է, որ դրանք հիմք են ստեղծում հարաբերությունների հետագա խորացման համար։
Խոսելով Հայաստանի և Ադրբեջանի հակամարտության մասին՝ Ազիզին ասել է.
«Այս տարածաշրջանում ռազմական բախումները մեզ անհանգստացնում են։Կողմերին զսպվածության կոչ ենք անում։ Ուժի կիրառումը վեճերի լուծման միջոց չէ, տարածաշրջանը երկխոսության կարիք ունի։ Տարածաշրջանի խնդիրները պետք է լուծեն տարածաշրջանի երկրները, և դրանց լուծման պատրվակով տարածաշրջանը չպետք է բացվի արտաքին ուժերի առջև։ Մեջլիսի ազգային անվտանգության և արտաքին քաղաքականության հանձնաժողովը հստակ հայտարարել է, որ դեմ է տարածաշրջանում աշխարհաքաղաքական և միջազգային սահմանների փոփոխությանը և աջակցում է երկրների տարածքային ամբողջականության պահպանմանը»։
Պապոյանն իր հերթին շնորհակալություն է հայտնել իրանական կողմին՝ դիրքորոշման համար և ընդգծել, որ արտաքին ուժերը որքան էլ փորձեն, չեն կարող վնասել հայ-իրանական հարաբերությունները։
