Հայաստանի և Ադրբեջանի միջև խաղաղության հնարավոր պայմանագրի իրագործման երաշխավորող միջազգային մեխանիզմներ պետք է ձևավորվեն, հակառակ դեպքում պայմանագրի ստորագրման հաջորդ օրը կարող է պատերազմ բռնկվել կամ նոր էսկալացիա տեղի ունենալ: Այս մասին ԱԺ-ում «Հայաստանի Հանրապետության կառավարության ծրագրի 2022 թվականի կատարման ընթացքի և արդյունքների մասին զեկույցի քննարկման ժամանակ հայտարարել է ՀՀ վարչապետ Նիկոլ Փաշինյանը:
Վարչապետը խաղաղությունը համարում է իր քաղաքական հանձնառությունը:
Խոսելով ԼՂ հիմնախնդրի մասին, նա այդ համատեքստում չափազանց կարևորեց, որ Բաքվի ու Ստեփանակերտի միջև երկխոսության միջազգային մեխանիզմ ձևավորվի, ու այդ մեխանիզմն ապահովի ԼՂ հայության իրավունքների ու անվտանգության ապահովման օրակարգի իրացումը․
Վարչապետը կարևորեց նաև տնտեսական և տրանսպորտային կոմունիկացիաների բացումը: Սակայն նոյեմբերի 9-ի հայտարարության 3-րդ կետով սահմանված ճանապարհները պետք է վերաբացվեն կողմերի սուվերենության և իրավազորության հիման վրա:
