2002 թվականի մայիսի 5-ը նշանակալից օր է Ապարան համայնքի բնակիչների, հայ առաքելական սուրբ եկեղեցու համար և, իհարկե, Ապարան քաղաքի բազմադարյան պատմության մեջ։ Այդ օրը Ապարանի հավատավոր ժողովրդին է հանձնվել իրենց նոր աղոթատունը` Քասախի բազիլիկը։
Վերաօծման օրն ունի իր պատմությունը։ Ասում են` Տեր Սիոն եպիսկոպոսը դռնբացեքի արարողության սկզբում իր մուրճով հարվածում է տաճարի դռանը և դադարում է ամբողջ օրը տեղացող անձրևը և Արագած լեռան վերևից արևի ճառագայթները ճերմացնում և լուսավորում են տաճարի` անձրևից արդեն թրջված և խոնավեցած պատերը։ Եվ արդեն հաջորդ օրը` մայիսի 5-ին ,Սուրբ սեղանը ներծծելով այս ամենը, սրբագործվում է Ամենայն Հայոց հայրապետի հովվապետական աջով։
Ամեն տարի մայիսի 5-ին հաջորդող կիրակի օրը ( այս տարի մայիսի 7-ին) տեղի է ունենում Սուրբ Պատարագ։
2023 թվականին լրացավ եկեղեցու վերաօծման 21-րդ տարելիցը։
Այս առիթով Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի բարձր տնօրինությամբ և Արագածոտնի Թեմի Առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ, Մայր Աթոռ Սուրբ Էջմիածնից Ապարանի Սուրբ Խաչ եկեղեցի բերվեց Քրիստոսի խաչափայտի մասունքը։
Հեղինակ՝ Լիլիթ Պետրոսյան
