2023 թվականի ապրիլի 21-ին առցանց ձևաչափով տեղի է ունեցել ԱՊՀ մասնակից պետությունների քրեակատարողական ծառայությունների ղեկավարների խորհրդի աշխատանքային խմբի հերթական՝ 7-րդ նիստը, որին մասնակցել են Խորհրդի քարտուղարության, Ռուսաստանի Դաշնության, Բելառուսի, Ղազախստանի, Ղրղզստանի, Ուզբեկստանի և Տաջիկստանի Հանրապետությունների քրեակատարողական ծառայությունների բարձրաստիճան ներկայացուցիչները: Հայաստանի Հանրապետության քրեակատարողական ծառայությունը ներկայացրել է ՔԿԾ շտաբի գլխավոր մասնագետ, արդարադատության կապիտան Ռաֆայել Հարությունյանը։
Նիստի շրջանակներում քննարկվել են ԱՊՀ մասնակից պետությունների քրեակատարողական հիմնարկներում կրթական, լուսավորչական, մշակութային, վերասոցիալականացման և ազատազրկման վայրերում անվտանգության ապահովման միջոցառումներին, օգտակար զբաղվածության ապահովմանը, վնասի նվազեցմանը, ԱՊՀ իրավապայմանագրային բազայի գույքագրմանը, քրեակատարողական ծառայությունների համար կադրերի պատրաստման Համաձայնագրին և անազատության մեջ գտնվող անձանց շրջանում օգտակար զբաղվածությանն առնչվող աշխատանքների փոխանակման փորձին վերաբերող հարցերը: Խորհրդի շրջանակներում անդրադարձ է կատարվել քրեակատարողական հիմնարկներում ահաբեկչության կանխարգելման և դրա դեմ պայքարի ուղղությամբ տարվող ռազմավարական գործիքակազմին:
Փորձագետների խմբի նիստում արծարծվել են նաև 2023 թվականի հոկտեմբերին Ուզբեկստանի Հանրապետությունում կայանալիք ԱՊՀ մասնակից պետությունների քրեակատարողական ծառայությունների ղեկավարների խորհրդի հերթական՝ 8-րդ նստաշրջանի նախապատրաստման և օրակարգի ձևավորմանն առնչվող հարցերը:
