Լաչինի միջանցքի հետ կապված հաջորդ զարգացումը կապված է երթուղու փոփոխության հետ: Այս մասին կառավարության այսօրվա նիստի ընթացքում հայտարարել է ՀՀ վարչապետ Նիկոլ Փաշինյանը։
«2022 թվականի օգոստոսին Ադրբեջանի և ԼՂ-ի իշխանությունների միջև կայացած համաձայնության արդյունքում՝ Լաչինի միջանցքի երթուղին փոխվեց նոր ճանապարհի գործարկմամբ, բայց քանի որ Լաչինի միջանցքը ՀՀ-ին կապող ճանապարհն ամբողջությամբ պատրաստ չէր, գործարկվեց ժամանակավոր երթուղի, որը մուտք էր գործում ՀՀ-ի տարածք Կոռնիձորի կամրջով, ապա նորից Ադրբեջանի տարածք, ապա նորից ՀՀ-ի տարածք»,- նշել է վարչապետ Նիկոլ Փաշինյանը:
Վարչապետի խոսքով՝ ձեռք բերված պայմանավորվածության համաձայն այդ երթուղին պետք է գործեր մինչև 2023 թվականի ապրիլի 1-ը.
«Նախօրեին մենք տեղեկացրել ենք ադրբեջանական կողմին, որ համաձայն պայմանավորվածության Կոռնիձորի կամրջից հետո ճանապարհը շարունակվելու է միայն ՀՀ-ի տարածքով և, որ ՀՀ-ի սահմանապահ զորքերը ստանձնելու են այդ հատվածում ՀՀ պետական սահմանի պահպանությունը: Ընդգծեմ, որ սահմանապահ զորքերը տեղակայվելու են ՀՀ-ի պետական սահմանին այն նույն դիրքերում, որտեղ մինչ օրս պաշտպանության նախարարության ստորաբաժանումներն էին տեղակայված: Պիտի արձանագրեմ, որ քիչ առաջ ադրբեջանական լրահոսում հայտնվեցին տեղեկություններ, որոնք փորձ են անում տեղի ունեցածը ներկայացնել, որպես մի հերթական բլոկբաստեր: Այս մոտեցումն առնվազն կառուցողական չէ, կրկնում եմ, որ հայկական դիրքերի որևէ փոփոխություն այս ամենի արդյունքում տեղի չի ունեցել այն տարբերությամբ, որ մենք մտադիր ենք խնդրո առարկա հատվածի պահպանությունն ի տարբերություն նախկինի իրականացնել սահմանապահ զորքերի միջոցով: Այսինքն, նույն դիրքերից ՀՀ պետական սահմանի երկայնքով ՊՆ-ի ստորաբաժանումները դուրս են գալու ըստ պլանի և նրանց փոխարեն տեղակայվելու են սահմանապահ զորքերի ստորաբաժանումներ: Մենք նույն առաջարկով հանդես ենք եկել նաև Ադրբեջանին, որպեսզի նույնը տեղի ունենա նրանց կողմից: Հույս ունեմ, որ այս գործընթացը տեղի կունենա առանց սադրանքների»:
Փաշինյանը խոսեց նաև հարաբերություններ կարգավորման մասին.
«Ի հեճուկս բոլոր դժվարությունների՝ ՀՀ կառավարությունը վերահաստատում է իր հավատարմությունը խաղաղության օրակարգին: Մենք հույս ունենք, որ առաջիկայում կոնկրետ տեղաշարժեր կլինեն ինչպես Ստեփանակերտ-Բաքու, այնպես էլ Հայաստան-Ադրբեջան բանակցային ձևաչափերում: ՀՀ-ն պատրաստ է նման աշխատանքի և հույս ունենք, որ Ստեփանակերտ-Բաքու ձևաչափում նման տրամադրվածություն կլինի թե՛ Բաքվի, թե՛ Ստեփանակերտի կողմից: Այս համատեքստում միջազգային պատշաճ մեխանիզմների և երաշխիքների գործարկումը չափազանց կարևոր է»:
