Ճապոնիայի արտաքին գործերի նախարարությունը 2003 թվականից ի վեր առաջին անգամ Հարավային Կուրիլյան կղզիները անվանել է օկուպացված Ճապոնիայի տարածք։ Այս մասին հայտնում են «Kyodo Tsushin» գործակալությունը և NHK հեռուստաալիքը
Նման սահմանում է պարունակվում երկրի արտաքին քաղաքականության պետական ուղեցույցի՝ «Կապույտ գրքի դիվանագիտության» նոր համարում, որը Ճապոնիայի ԱԳՆ-ն ամեն տարի հրատարակում է 1957 թվականից։
Ուղեցույցի թարմացված տարբերակը, որը թողարկվել է ապրիլի 22-ին, ներառում էր նաև այն ձևակերպումը, որ կղզիները «Ճապոնիայի անբաժանելի մասն են»: Նման նկարագրություն փաստաթղթում բացակայում էր 2011 թվականից, նշում է գործակալությունը։
Բացի այդ, Ճապոնիայի ԱԳՆ-ն դատապարտել է Ռուսաստանի ներխուժումն Ուկրաինա՝ այն անվանելով «բռնություն, որը խարխլում է միջազգային կարգի հիմքերը ոչ միայն Եվրոպայում, այլև Ասիայում», և ասել, որ այդ ֆոնին դժվար է խոսել Ռուսաստանի հետ խաղաղության պայմանագրի կնքման շուրջ բանակցությունների հեռանկարների մասին: